یو این آئی
ممبئی/ٹی 20 ورلڈ کپ 2026 کے گروپ سی میں ایک بڑا الٹ پھیر دیکھنے کو ملا ہے ، جہاں اٹلی نے نیپال کو یکطرفہ مقابلے کے بعد 10 وکٹوں سے عبرتناک شکست دے دی۔ فٹ بال کے لیے مشہور ملک اٹلی نے کرکٹ کے میدان میں اپنی تاریخی جیت درج کر کے دنیا کو حیران کر دیا۔ممبئی کے وانکھیڑے اسٹیڈیم میں کھیلے گئے اس میچ میں اٹلی نے ٹاس جیت کر نیپال کو بیٹنگ کی دعوت دی اور اسے محض 123 رنز پر ڈھیر کر دیا۔ جواب میں اٹلی کے اوپنرز نے نیپالی بولرز کی ایک نہ چلنے دی اور مطلوبہ ہدف صرف 12.4 اوورز میں بغیر کسی نقصان کے حاصل کر لیا۔124 رنز کے ہدف کا تعاقب کرتے ہوئے اٹلی کے دونوں اوپنرز (موسکا بھائیوں) نے گراؤنڈ کے چاروں طرف چھکوں اور چوکوں کی برسات کر دی:اینتھنی موسکا: 62 رنز (ناقابلِ شکست) اور جسٹن موسکا: 60 رنز (ناقابلِ شکست) کی عمدہ بلے بازی کی بدولت اٹلی نے یہ میچ 44 گیندیں قبل ہی جیت کر اپنا نیٹ رن ریٹ غیر معمولی طور پر بہتر کر لیا ہے ، جس سے ان کے اگلے راؤنڈ میں پہنچنے کے امکانات روشن ہو گئے ہیں۔اس سے قبل نیپال کی بیٹنگ لائن اطالوی اسپنرز کے سامنے ریت کی دیوار ثابت ہوئی۔ نیپال کی جانب سے عارف شیخ 27 رنز کے ساتھ نمایاں رہے ۔ اٹلی کے کرشن کلوگاماگے نے 22 رنز دے کر 3 وکٹیں حاصل کیں اور انہیں ‘پلیئر آف دی میچ’ قرار دیا گیا۔ بین مینینٹی نے بھی صرف 9 رنز دے کر 2 وکٹیں حاصل کیں۔وانکھیڑے اسٹیڈیم کے اسٹینڈز میں موجود اطالوی شائقین اپنی ٹیم کی اس تاریخی فتح پر نہال نظر آئے ۔ نیپال کی ٹیم، جو انگلینڈ کے خلاف اپنی کارکردگی سے پراعتماد تھی، آج مکمل طور پر بے بس دکھائی دی۔ اٹلی کے لیے یہ ایک ایسا خواب ہے جو حقیقت بن کر ان کے سامنے آیا ہے ۔
