عظمیٰ نیوز سروس
سرینگر//پولیس نے شمالی کشمیر کے بارہمولہ ضلع میں غیر قانونی اسلحہ رکھنے کے کیس کا پردہ فاش کرتے ہوئے2 غیر ملکی ساختہ پستول برآمد کئے اور اس کے بعد مزید تفتیش کے دوران ملزم کے گھر سے ہتھیاروں اور گولہ بارود کا ایک اضافی ذخیرہ بھی برآمد کیا۔پولیس نے ایک بیان کہاکہ بارہمولہ پولیس اور 52 راشٹریہ رائفلز کی طرف سے7 جون کو ایف سی آئی گودام کے قریب چندسوماکانسپورہ میں قائم ایک موبائل وہیکل چیکنگ پوائنٹ پر ایک مشترکہ آپریشن کے دوران ایک ترکی ساختہ پستول برآمد کیا گیا تھا۔پولیس نے مطابق چیکنگ آپریشن کے دوران، ایک سفید ماروتی بریزا زیر نمبرJK02DN-6527،جو سری نگرسے بارہمولہ کی طرف سفر کر رہی تھی۔ گاڑی کی تلاشی لینے پر، سیکورٹی اہلکاروں نے ایک مسافر کے بیگ سے ترکی میں تیار کردہCANIK-TP9SF-METE(9×19ایم ایم )پستول برآمد کیا۔ملزم کی شناخت وکیل احمد ٹھیکری ولد نورالدین ٹھیکری ساکانہ کمل کوٹ اوڑی کے نام سے ہوئی ہے۔
پولیس کا کہنا ہے کہ ملزم اسلحہ رکھنے کے لیے کوئی درست لائسنس یا اجازت نامہ پیش کرنے میں ناکام رہا۔ابتدائی تحقیقات سے معلوم ہوا کہ گاڑی کا ڈرائیور محض ملزم کو لفٹ فراہم کر رہا تھا اور اس نے دعویٰ کیا کہ اسے اسلحے کا کوئی علم نہیں تھا۔بازیابی کے بعد، پولیس اسٹیشن بارہمولہ نے آرمس ایکٹ کی دفعہ7/25 کے تحت ایف آئی آر نمبر70/2026 درج کی اور ہتھیار کے ذریعہ اور ارادے کے استعمال کا پتہ لگانے کے لیے تحقیقات کا آغاز کیا۔ تفتیش کے دوران سامنے آنے والی سراغ پر کارروائی کرتے ہوئے، پولیس نے8 جون کو کمل کوٹ کے کلسی ہردو میںگرفتار ملزم کی نشاندہی پر تلاشی مہم چلائی۔جس دوران پولیس نے چینی ساختہ ایک اور پستول، 2 میگزینز اور گولہ بارود کے 13 زندہ راؤنڈ برآمد کیے، جن میں سے تمام کو شواہد کے طور پر قبضے میں لے لیا گیا۔ پولیس نے تازہ ترین برآمدگی کو ایک اہم پیش رفت قرار دیا، جس سے علاقے میں غیر قانونی نیٹ ورک کی موجودگی کا اشارہ ملتا ہے۔
