عظمیٰ نیوز سروس
سرینگر//اپنی پارٹی کے صدر سید محمد الطاف بخاری نے جمعرات کو انتظامیہ سے کہا کہ وہ عیدالفطر کے موقع پر جموں و کشمیر میں گیس اور ایندھن کے مناسب ذخیرہ کو یقینی بنانے کے لیے چوکس اور پوری طرح تیار رہے۔انہوں نے اپنے X ہینڈل پر لکھا: “مشرق وسطیٰ میں جاری تنازعات کی وجہ سے ایل پی جی اور دیگر ایندھن کی ممکنہ قلت کے حوالے سے خدشات پیدا ہو گئے ہیں۔ حکام کو اس بات کو یقینی بنانے کے لیے اب کارروائی کرنی چاہیے کہ عید الفطر کے لیے ایل پی جی، پیٹرول اور دیگر ضروری سامان کا مناسب ذخیرہ موجود ہے۔”انہوں نے مزید کہا کہ “متعلقہ محکموں کو الرٹ اور پوری طرح تیار رہنا چاہیے تاکہ لوگوں کو اس اہم اور بابرکت موقع پر ضروری اشیاء کی کمی کا سامنا نہ کرنا پڑے۔” بخاری نے جمعتہ الوداع کے مقدس موقع پر جموں کشمیر کے لوگوں کو دل کی گہرائیوں سے مبارکباد پیش کی ہے۔ انہوں نے لوگوں سے اپیل کی کہ وہ جمعتہ الوداع کے موقع پر جموں و کشمیر میں امن، ہم آہنگی اور خوشحالی کے لیے خصوصی دعائیں کریں۔
