شہر میں تازہ ہلاکتیں| حفاظتی انتظامات مزید سخت، جگہ جگہ چیکنگ

 

نیوز ڈیسک

 

نئی دہلی // کشمیر میں شہریوں کی ٹارکٹ کلنگ کے بیچ 5,500 اضافی سی آر پی ایف اہلکاروں کو وادی بھیجا گیا ہے۔حکام نے بتایا کہ مرکزی وزارت داخلہ نے گزشتہ ماہ ہدایت دی تھی کہ وادی کشمیر میں عام شہریوں کی ٹارگٹ کلنگ کے پیش نظر مرکزی فورسز کی تقریباً 55 نئی کمپنیاں تعینات کی جائیں۔انہوں نے کہا کہ آخری پانچ کمپنیاں اگلے ہفتے تک پہنچ جائیں گی۔ایک عہدیدار نے بتایا کہ ان میں سے 25 کمپنیاں سینٹرل ریزرو پولیس فورس (CRPF) سے ہیں، باقی کا تعلق بارڈر سیکورٹی فورس (BSF) سے ہے۔ ایک CAPF کمپنی میں تقریباً 100 اہلکار ہوتے ہیں۔سی آر پی ایف جموں و کشمیر میں امن و امان اور انسداد دہشت گردی کے فرائض کیلئے وسیع پیمانے پر تعینات ہے جس میں تقریباً 60 بٹالین ہیں، جن میں سے ہر ایک میں تقریباً 1,000 اہلکار شامل ہیں، جو کشمیر میں مقیم ہیں۔انہوں نے کہا کہ بی ایس ایف فوج کی آپریشنل کمانڈ ہندوستان وپاکستان لائن آف کنٹرول (ایل او سی) کی حفاظت کرتی ہے اور اس کے کچھ یونٹ شہروں میں بھی امن و امان کے فرائض انجام دینے کیلئے تعینات ہیں۔جموں و کشمیر میں یکم اکتوبر سے ٹارگٹ کلنگ کے نتیجے میں کم از کم 14 افراد اپنی جانیں گنوا چکے ہیں۔ہلاک ہونے والوں میں سے پانچ بہار کے مزدور تھے، جب کہ دو اساتذہ سمیت تین کا تعلق کشمیر کی اقلیتی برادریوں سے تھا۔عہدیداروں نے بتایا کہ سی آر پی ایف اور دیگر سیکورٹی فورسز نے مشترکہ کارروائیوں کے دوران اس سال مرکز کے زیر انتظام علاقے میں کل 112 جنگجوئوں کو ہلاک اور 135 کو گرفتار کیا ہے۔