منظر نامے میں تبدیلی لائی، صحت کی معیاری تعلیم کو قابل رسائی بنایا:ایل جی سنہا
سرینگر// لیفٹیننٹ گورنر منوج سنہا نے ہفتہ کے روز طبی برادری کی غیر متزلزل لگن، ہمدردی اور دوسروں کی دیکھ بھال اور ملک کی ترقی میں حصہ ڈالنے کے لیے ذاتی قربانی کی تعریف کی۔موصوف صورہ میڈیکل انسٹچوٹ کے سالانہ فیسٹیول ہفتے کی اختتامی تقریب سے خطاب کررہے تھے۔ اس تقریب میں 29ویں پوسٹ گریجویٹ ریسرچ پریزنٹیشن پروگرام (PGRP-2025)کا آغاز اور لیفٹیننٹ گورنر کی طرف سے PGRPایوارڈ یافتہ، ڈاکٹروں، نرسنگ اسٹاف اور SKIMSکے ملازمین کی اعزازی تقریب بھی ہوئی۔لیفٹیننٹ گورنر نے اس بات پر روشنی ڈالی کہ جموں و کشمیر نے 2019کے بعد صحت کی دیکھ بھال میں بڑے پیمانے پر بنیادی ڈھانچے کی توسیع اور اختراعی حل کا مشاہدہ کیا ہے۔انہوں نے کہا ’’ہم نے گزشتہ 5 سالوں میں جموں و کشمیر کی طبی تعلیم اور صحت عامہ کے منظر نامے میں تبدیلی لائی ہے۔ ایم بی بی ایس کی 500نشستیں بنانے میں تقریباً سات دہائیاں لگیں۔ ہم نے 4سال کے اندر ایم بی بی ایس کی 800 اضافی سیٹیں معرض وجود میں لائیں‘‘۔انہوں نے کہا کہ بڑے مسائل جیسے سرکاری میڈیکل کالجوں کی کمی، ناقابل برداشت نجی ادارے ماضی کی بات ہیں۔انہوں نے مزید کہا’’ 2020سے 2024 کے درمیان جرات مندانہ اور نظامی اصلاحات کے ساتھ، ہم نے صحت کی دیکھ بھال کی معیاری تعلیم کو مزید قابل رسائی بنایا ہے‘‘۔لیفٹیننٹ گورنر نے اس بات کو یقینی بنانے کے اپنے عزم کا اعادہ کیا کہ معیاری صحت کی دیکھ بھال تمام شہریوں کے لیے قابل رسائی اور سستی ہے۔سنہا نے کہا’’ہمیں علم، اختراع اور تحقیق کے ذریعے صحت کی دیکھ بھال کے شعبے کو فروغ دینا چاہیے۔ ایک کثیر الثباتی نقطہ نظر جو کہ بیماری کے علاج سے بالاتر ہو، افراد کی جسمانی، ذہنی اور سماجی بہبود کے لیے اپنایا جانا چاہئے‘‘۔لیفٹیننٹ گورنر نے پچھلے 4-5برسوں میں SKIMSکی تبدیلی اور صحت عامہ اور طبی تعلیم میں اس کی اہم شراکت کی بھی تعریف کی۔ انہوں نے کہا کہ 1,100سے زائد طویل عرصے سے زیر التوا ترقیاں عمل میں لائی گئیں اور تقریباً 1,300پیرامیڈیکل اور وزارتی عہدوں کو بحال کیا گیا ، جن میں 120 فیکلٹی اسامیاں بھی شامل ہیں۔ 1,800سے زائد ڈی پی سی پروموشنز کو کلیئرنس دی گئی اور اضافی 367 نان گزیٹڈ اور 159 گزیٹڈ آسامیوں کو ریکروٹنگ ایجنسیوں کو بھیج دیا گیا۔ SKIMSٹرانسپلانٹ سروسز، ایمرجنسی اور ٹراما کیئر، نیورو سائنسز، کارڈیک سائنسز، رینل میڈیسن، اور پلمونری امراض، اینڈوکرائن اور میٹابولک عوارض میں فیوچر سینٹرز آف ایکسیلنس قائم کرنے کا بھی منصوبہ بنا رہا ہے۔لیفٹیننٹ گورنر نے سکمزکے لیے مختلف منصوبوں کا افتتاح کیا جس میں ایمرجنسی S.M.A.R.Tلیب کا آغاز بھی شامل ہے۔لیفٹیننٹ گورنر نے SKIMS کے کئی منصوبوں کا سنگ بنیاد رکھا۔ ان منصوبوں میں سینٹر فار ون ہیلتھ، 3 ایم ایل ڈی سیوریج ٹریٹمنٹ پلانٹ، ملٹی لیول کار پارکنگ، اٹینڈنٹ ان فیز II اور ہاسٹلز کے لیے شاپنگ کمپلیکس شامل ہیں۔ اس موقع پر SKIMS میں نئے ڈیجیٹل اقدامات کا بھی آغاز کیا گیا۔لیفٹیننٹ گورنر نے صحت کی دیکھ بھال کے نئے ماڈل تیار کرنے اور رسائی کو بڑھانے کے لیے جدید ٹیکنالوجی سے فائدہ اٹھاتے ہوئے کثیر جہتی نقطہ نظر کو اپنانے پر زور دیا۔ ڈائریکٹر سکمزپروفیسر محمد اشرف گنائی ،پروفیسر وویک لال، ڈائریکٹر PGIMERچندی گڑھ؛ پروفیسر اے رویندر ناتھ، وائس چانسلرسنٹرل یونیورسٹی کشمیر؛ انشل گرگ، ڈویژنل کمشنر کشمیر، وی کے بردی، آئی جی پی کشمیر؛ اکشے لابرو، ڈپٹی کمشنر سرینگر، سینئر افسران، طبی پیشہ ور افراد، شعبہ جات کے سربراہان، فیکلٹی، طلبا اور SKIMS کے عملے نے اختتامی تقریب میں شرکت کی۔
