رنجیت ساگر اور شاہ پور کنڈی ڈیموں کی تعمیر کی لاگت

 بلال فرقانی

سرینگر //پنجاب حکومت نے جموں و کشمیر انتظامیہ سے کہا ہے کہ وہ رنجیت ساگر اور شاہ پور کنڈی ڈیموں کی تعمیر کی لاگت دونوں ریاستوں کے درمیان پہلے سے طے شدہ شرائط کے مطابق بانٹے۔تقریبا ً973 کروڑ روپے کے بقایا جات کے طور پر، پنجاب حکومت نے اس مسئلے کو حل کرنے کے لیے جموں و کشمیر کے مرکزی علاقے کے جل شکتی محکمہ میں اپنے ہم منصبوں کے ساتھ میٹنگ طلب کی ہے۔ ریاست کے آبی وسائل کے محکمے کی طرف سے ایک خط بھیجا گیا ہے، جس میں میٹنگ اور اس مسئلے کے جلد حل کا مطالبہ کیا گیا ہے۔ پنجاب رنجیت ساگر ڈیم میں جموں و کشمیر کے حصہ کے طور پر 301.02 کروڑ روپے اور شاہ پور کنڈی ڈیم پروجیکٹ کی تعمیر کے لیے 672.42 کروڑ روپے مانگ رہا ہے۔رنجیت ساگر ڈیم (جسے پہلے تھین ڈیم کے نام سے جانا جاتا تھا)کے بارے میں پنجاب کا موقف یہ ہے کہ 20 جنوری 1979 کو پنجاب اور جموں و کشمیر کے درمیان ایک دو طرفہ معاہدہ ہوا تھا۔

اس معاہدے کی شق 1 کے مطابق، آبپاشی کے حصے سے منسوب منصوبے کی کل لاگت کا 10 فیصد حکومت جموں و کشمیر کو ادا کرنا تھا۔ شق 1 میں کہا گیا ہے “اس معاہدے کے فریقین تھین ڈیم پروجیکٹ میں مشترکہ شراکت دار ہوں گے، تاہم، جموں و کشمیر حکومت صرف اس منصوبے کے آبپاشی کے حصے میں سرمایہ کاری کرے گی ،پروجیکٹ کی کل لاگت کا 10 فیصد، جو اس کے آبپاشی کے حصے سے منسوب ہے۔”جموں و کشمیر کے جل شکتی محکمے کو بھیجے گئے خط میں، پنجاب نے کہا ہے کہ (مذکورہ بالا) شق کے مطابق، ساگر ڈیم کے مالیاتی مشیر اور چیف اکائونٹس آفیسر نے ادا کی جانی والی کل رقم 300.13کروڑ روپے کا حساب لگایا ہے ہے، جس میں 28 فروری 2026 تک غیر ادا شدہ رقم پر سود بھی شامل ہے، جب کہ منصوبے کی کل لاگت 5,755.54 کروڑ، اورآبپاشی کے حصے کی لاگت 656.13 کروڑ روپے ہے۔ اصل قابل ادائیگی رقم 65.61 کروڑ روپے ہے اور ان غیر ادا شدہ واجبات پر سود (15 فیصد کی شرح سے) 235.41 کروڑ روپے ہے، جو یکم اپریل 2002 سے 28 فروری 2026 تک وصول کرنا باقی ہیں۔شاہ پور کنڈی ڈیم کے بارے میں، پنجاب کا اصرار ہے کہ 1979 میں پنجاب اور جموں و کشمیر کے درمیان طے پانے والے دو طرفہ معاہدے کی شق 6 کے مطابق، مخر الذکر راوی نہر کو شاہ پور کنڈی بیراج سے نکال کر مذکورہ بیراج کی لاگت میں حصہ ڈالنا تھا۔سیکرٹری، آبی وسائل محکمہ پنجاب کے خط کے مطابق “جموں و کشمیر کی حکومت نے مارچ 2011 کی قیمتوں کی بنیاد پر تھین ڈیم سے راوی نہر کی توسیع کے لیے 410.29 کروڑ روپے کا تخمینہ پیش کیا تھا۔ سالانہ لاگت میں 6 فیصد اضافے کے بعد، یہ رقم 28 فروری 2026 تک بڑھ کر 777.58 کروڑ روپے ہو جاتی ہے۔ شاہ پور کنڈی ڈیم سے راوی کینال کا بقیہ حصہ معاہدے کی شق 6 کے مطابق، جموں و کشمیر کو 28 فروری 2026 تک 672.42 کروڑ روپے کے فرق کی ادائیگی کرنا ہے۔پنجاب میں حکام کا کہنا ہے کہ اگرچہ وہ یہ معاملہ جموں و کشمیر کے ساتھ مسلسل اٹھا رہے ہیں، لیکن کوئی جواب موصول نہیں ہوا اور نہ ہی واجب الادا رقم موصول ہوئی ہے۔ انہوںنے کہا، “جے اینڈ کے کی طرف سے اپنے حصے کے مطابق مناسب مالی امداد کی عدم موجودگی میں پنجاب کے لیے بنیادی ڈھانچے کو برقرار رکھنا مشکل ہے۔”