زخمیوں میں کمسن بچہ بھی شامل، دو افراد کو سر پر چوٹیںآئیں
سمت بھارگو
راجوری//راجوری قومی شاہراہ پر بدھ کی شام ایک افسوسناک سڑک حادثہ پیش آیا جس میں ایک منی بس الٹ جانے سے کم از کم گیارہ افراد زخمی ہوگئے۔ زخمیوں میں ایک کمسن بچہ بھی شامل ہے۔ حادثہ بتھونی کے مقام پر پیش آیا جس کے بعد علاقے میں کچھ دیر کے لئے خوف و ہراس پھیل گیا۔اطلاعات کے مطابق منی بس زیر نمبر JK11-1469 اچانک بے قابو ہو کر شاہراہ کے بیچوں بیچ الٹ گئی۔ حادثے کی اصل وجہ فوری طور پر معلوم نہیں ہو سکی ہے، تاہم پولیس نے واقعے کی تحقیقات شروع کر دی ہیں۔ بس میں سوار مسافروں اور شاہراہ سے گزرنے والے دیگر افراد میں افراتفری مچ گئی۔حادثے کی اطلاع ملتے ہی مقامی لوگ اور پولیس اہلکار موقع پر پہنچ گئے اور فوری طور پر امدادی کارروائیاں شروع کیں۔ تمام زخمیوں کو فوری طور پر گورنمنٹ میڈیکل کالج سے منسلک ہسپتال راجوری منتقل کیا گیا جہاں ان کا علاج جاری ہے۔ہسپتال ذرائع کے مطابق دو زخمیوں کو سر پر چوٹیں آئی ہیں جبکہ دیگر افراد کی حالت خطرے سے باہر بتائی جا رہی ہے۔ ڈاکٹروں کی ٹیم زخمیوں کو ضروری طبی امداد فراہم کر رہی ہے اور ان کی حالت پر مسلسل نظر رکھی جا رہی ہے۔زخمیوں کی شناخت نیشو دیوی زوجہ وید پرکاش ساکن اگراٹی، سونو کمار ولد بھولا رام ساکن بتھونی، چندر پربھا زوجہ راج کمار ساکن ساسلکوٹ، ریتا دیوی زوجہ سریندر کمار ساکن اگراتی، ہیپی شرما ولد نیتار پرکاش ساکن اگراتی، رخسانہ کوثر زوجہ شکور احمد ساکن اگراتی، کلثوم بی بی زوجہ خادم حسین ساکن پھروالہ، محمد قدیر ولد غلام حسین ساکن اگراتی، خادم حسین ولد شیر محمد ساکن پھروالہ، قدیر حسین کے آٹھ سالہ بچے ساکن اگراتی، اور صوفیہ اختر زوجہ قدیر حسین ساکن اگراتی کے طور پر ہوئی ہے۔ادھر پولیس نے واقعے کا نوٹس لیتے ہوئے کہا ہے کہ حادثے کی وجوہات جاننے کے لئے مزید تفتیش جاری ہے۔ حکام نے عوام سے اپیل کی ہے کہ وہ شاہراہ پر سفر کے دوران احتیاطی تدابیر اختیار کریں اور ٹریفک قوانین کی پابندی یقینی بنائیں تاکہ ایسے حادثات سے بچا جا سکے۔
