سمت بھارگو
راجوری//راجوری میں آرمی ویٹرنز ڈے کے موقع پر منعقدہ تقریب کے دوران ایک غیر معمولی اور جذباتی لمحہ اس وقت دیکھنے کو ملا جب جموں و کشمیر حکومت کے وزیر ستیش شرما اسٹیج پر خطاب کرتے ہوئے اپنے جذبات پر قابو نہ رکھ سکے۔ اپنے مرحوم والد، سابق فوجی اور نامور عوامی رہنما مدن لال شرما کی یاد نے انہیں اس قدر آبدیدہ کر دیا کہ کچھ لمحوں کے لئے وہ گفتگو جاری نہ رکھ سکے۔فوج کی ناردرن کمان کی جانب سے 10ویں آرمی ویٹرنز ڈے کے موقع پر راجوری میں دو روزہ سابق فوجیوں کی ریلی کا انعقاد کیا جا رہا ہے۔ اس تقریب کے پہلے روز وزیر ستیش شرما نے مہمانِ خصوصی کی حیثیت سے شرکت کی، جہاں سابق فوجیوں، حاضر سروس جوانوں اور ان کے اہلِ خانہ کی بڑی تعداد موجود تھی۔خطاب کے دوران وزیر نے اپنے والد مرحوم مدن لال شرما کو یاد کرتے ہوئے کہا کہ وہ پہلے فوج میں خدمات انجام دے چکے تھے اور بعد ازاں عوامی زندگی میں قدم رکھ کر ایک مثالی سیاسی سفر طے کیا۔ انہوں نے بتایا کہ مدن لال شرما تین مرتبہ جموں۔پونچھ حلقے سے رکنِ پارلیمنٹ منتخب ہوئے اور جموں و کشمیر قانون ساز اسمبلی کے رکن بھی رہے۔جذبات پر قابو پاتے ہوئے ستیش شرما نے کہا کہ انہیں ایک سابق فوجی کا بیٹا ہونے پر فخر ہے اور ان کی زندگی میں نظم و ضبط، قربانی اور حب الوطنی کی جو قدریں رچی بسی ہیں، وہ سب انہیں اپنے والد سے وراثت میں ملی ہیں۔ انہوں نے معروف قول ’ایک بار سپاہی، ہمیشہ سپاہی‘ کا حوالہ دیتے ہوئے کہا کہ فوج کی روح کبھی وردی اتارنے کے بعد بھی انسان کا ساتھ نہیں چھوڑتی۔وزیر کے اس جذباتی خطاب نے تقریب میں موجود سابق فوجیوں اور دیگر شرکاء کو بھی متاثر کیا، جنہوں نے کھڑے ہو کر تالیاں بجا کر ان کے جذبات کو سراہا۔ یہ لمحہ ویٹرنز ڈے کی تقریبات میں ایک گہرا انسانی پہلو لے آیا اور اس بات کو مزید مضبوط کیا کہ فوجی، ان کے اہلِ خانہ اور قوم کے درمیان رشتہ ہمیشہ احترام اور قربانی سے جڑا رہتا ہے۔
