عظمیٰ نیوز سروس
سرینگر// فروری 2024 میں شروع ہونے والے پی ایم سوریہ گھر مفت بجلی یوجنا کے تحت جموں و کشمیر میں کل 97,260 درخواستیں موصول ہوئی ہیں اور 25,160 چھتوں پر شمسی نظام نصب کیے گئے ہیں، جن میں 182.21 کروڑ روپے مرکزی مالیاتی امداد کے طور پر تقسیم کیے گئے ہیں۔ راجیہ سبھا کو مرکز نے مطلع کیا کہ کشمیر میں تیل کمپنیوں کے ذریعہ چلائے جانے والے زیادہ تر ریفل سٹیشنوں میں اپنی توانائی کی ضروریات کو پورا کرنے کے لئے شمسی توانائی موجود ہے۔ نئی اور قابل تجدید توانائی کے وزیر مملکت شری پد یسو نائک نے کہا کہ یہ سکیم مانگ پر مبنی ہے اور جموں و کشمیر میں مقامی ڈسکام کے تحت گرڈ سے منسلک بجلی والے تمام رہائشی صارفین کے لیے دستیاب ہے۔
وزارت کے مطابق، روف ٹاپ سولر سکیم فروری 2024 میں شروع کی گئی تھی اور سکیم کے نیشنل پورٹل کے ذریعے درخواستیں جمع کی جاتی ہیں۔نئی اور قابل تجدید توانائی کی وزارت کی طرف سے فراہم کردہ سال وار اعداد و شمار سے پتہ چلتا ہے کہ 13 فروری سے 31 دسمبر 2024 کے درمیان جموں و کشمیر میں کل 7,097 درخواستیں موصول ہوئیں، جن میں سے 560 چھتوں پر شمسی نظام نصب کیے گئے، جن میں 2.53 کروڑ روپے مرکزی امداد کے طور پر جاری کیے گئے۔2025 میں، درخواستیں تیزی سے بڑھ کر 76,146 ہوگئیں، جس کے نتیجے میں 17,939 چھتوں پر شمسی نظام کی تنصیب ہوئی، جب کہ سبسڈی کے حصے کے تحت مستفید ہونے والوں کو 128.23 کروڑ روپے تقسیم کیے گئے۔1 جنوری سے 5 مارچ 2026 تک، یوٹی نے 14,017 درخواستیں، 6,661 تنصیبات، اور 51.45 کروڑ کی مرکزی امداد جاری کی۔وزیر نے ایوان کو بتایا کہ وزارت مختلف سطحوں پر سکیم کی پیشرفت کی باقاعدگی سے نگرانی کر رہی ہے جس میں DISCOMs کے ساتھ تال میل بھی شامل ہے۔ ریگولیٹری منظوری کے عمل کو بھی تکنیکی فزیبلٹی کی ضروریات کو چھوڑ کر اور 10 کلو واٹ تک خودکار لوڈ بڑھانے کو فعال کر کے آسان بنایا گیا ہے۔
