سمت بھارگو
راجوری//جموں خطے کے مختلف علاقوں میں جمعہ کے روز ہونے والی موسلا دھار بارش نے معمولات زندگی کو بری طرح متاثر کر دیا ہے، جس کے باعث روزمرہ کی سرگرمیاں تقریباً مفلوج ہو کر رہ گئی ہیں۔ ضلع راجوری میں علی الصبح سے ہی جاری شدید بارش نے نظامِ زندگی کو متاثر کیا اور لوگوں کو شدید مشکلات کا سامنا کرنا پڑا۔گزشتہ چند روز سے ضلع میں خراب موسمی حالات برقرار ہیں اور وقفے وقفے سے بارش کا سلسلہ جاری تھا، تاہم جمعہ کی صبح ہونے والی شدید بارش نے صورتحال کو مزید سنگین بنا دیا۔ مختلف علاقوں سے موصول ہونے والی اطلاعات کے مطابق مسلسل بارش کے باعث ٹرانسپورٹ، کاروباری سرگرمیوں اور لوگوں کی نقل و حرکت میں نمایاں رکاوٹ پیدا ہوئی ہے۔
مقامی لوگوںنے بتایا کہ خراب موسم کے سبب انہیں روزمرہ کے کاموں میں شدید دشواری پیش آ رہی ہے جبکہ کئی مقامات پر سڑکیں بھی پھسلن کا شکار ہو گئی ہیں۔حکام کے مطابق جموں صوبے کے تمام اضلاع میں بارش ریکارڈ کی گئی ہے، جن میں راجوری سمیت بعض اضلاع میں درمیانی سے شدید بارش ہوئی، جبکہ بالائی علاقوں میں تازہ برفباری بھی دیکھنے میں آئی ہے۔پہاڑی اضلاع جیسے راجوری، پونچھ، ریاسی، رامبن، ڈوڈہ اور کشتواڑ کے بالائی علاقوں میں برفباری کے باعث درجہ حرارت میں نمایاں کمی واقع ہوئی ہے، جس سے سردی کی شدت میں اضافہ ہو گیا ہے۔محکمہ موسمیات اور ضلعی انتظامیہ نے عوام کو خبردار کیا ہے کہ موجودہ خراب موسمی صورتحال آئندہ چند دنوں تک برقرار رہ سکتی ہے، جس کے دوران آسمان ابر آلود رہنے اور وقفے وقفے سے بارش کا امکان ہے۔ادھر راجوری میں جموں و کشمیر پولیس نے ایک ایڈوائزری جاری کرتے ہوئے مختلف سب ڈویژن، پولیس اسٹیشن اور پولیس پوسٹ کے لیے ہیلپ لائن نمبرز فراہم کیے ہیں۔ عوام سے اپیل کی گئی ہے کہ کسی بھی ہنگامی صورتحال میں فوری طور پر متعلقہ نمبرز پر رابطہ کریں۔انتظامیہ نے شہریوں کو ہدایت دی ہے کہ وہ غیر ضروری سفر سے گریز کریں، احتیاطی تدابیر اختیار کریں اور سرکاری ہدایات پر عمل کریں تاکہ کسی بھی ناخوشگوار واقعہ سے بچا جا سکے۔
