عظمیٰ نیوز سروس
سرینگر//پولیس نے ہفتہ کو جموں و کشمیر کے بارہمولہ ضلع میں ممنوعہ جماعت اسلامی کے خلاف UAPA کیس کے سلسلے میں متعدد مقامات پر چھاپے مارے۔حکام نے بتایاکہ شمالی کشمیر کے سوپور کے جامعہ قدیم، نسیم باغ، کرانکشیون، تارزو، امرگڑھ، وارپورہ، بومئی، بوئٹنگو اور دیگر علاقوں سمیت 15 سے زائد مقامات پر تلاشی کی کارروائیاں کی گئیں۔حکام نے بتایا کہ تلاشی کے دوران، کالعدم تنظیم سے منسلک لٹریچر سمیت اشتعال انگیز مواد مزید تفتیش کے لیے تحویل میں لیا گیا۔یہ کارروائی غیر قانونی سرگرمیاں (روک تھام) ایکٹ(یو اے پی اے) کی دفعہ 10 اور 13 کے تحت سوپور پولیس سٹیشن میں جے آئی کے خلاف درج کی گئی ایف آئی آر کے سلسلے میں ہوئی ہے۔عہدیداروں نے بتایا کہ مربوط آپریشن نامزد UAPA عدالت سے مناسب تلاشی وارنٹ حاصل کرنے کے بعد کیا گیا ، اور ایگزیکٹو مجسٹریٹس اور آزاد گواہوں کی موجودگی میں مناسب قانونی طریقہ کار کے مطابق انجام دیا گیا ۔ انہوں نے کہا کہ یہ کارروائی سوپور پولیس کی ممنوعہ تنظیموں اور ملک دشمن نیٹ ورکس سے منسلک سرگرمیوں میں ملوث افراد کی نشاندہی کرنے اور ان کے خلاف کارروائی کرنے کی مسلسل کوششوں کا حصہ ہے، انہوں نے مزید کہا کہ مزید تفتیش جاری ہے۔
