عظمیٰ نیوز سروس
بارہمولہ// قومی تحقیقاتی ایجنسی نے مقامی پولیس کی مدد سے، جاری تحقیقات کے ایک حصے کے طور پر پیر کو شمالی کشمیر میں رہائشی مکانوں پر متعدد چھاپے مارے ۔حکام نے بتایاکہ این آئی اے کی ایک ٹیم نے بانڈی پورہ پولیس کے ساتھ پلان بانڈی پورہ میں ایک ریٹائرڈ سکول ٹیچر کے گھر پر چھاپہ مارا۔ حکام نے بتایا کہ تلاشی آپریشن جاری تحقیقات کے سلسلے میں کیا گیا۔ مزید انکشاف کیا گیا کہ مذکورہ سکول ٹیچر کا بیٹا غیر قانونی سرگرمیوں کی روک تھام کے قانون کے تحت پہلے ہی زیر حراست ہے۔ایک الگ کارروائی میں، این آئی اے کی ٹیم نے مصطفی آباد گوردوارہ میں ایک شخص کی رہائش گاہ پر بھی چھاپہ مارا۔ تلاشی اسی تفتیش کا حصہ تھی اور قانونی طریقہ کار کے بعد کی گئی تھی۔ دریں اثنا، بارہمولہ ضلع کے زیتھن رفیع آباد کے رہائشی مکان پر این آئی اے کا ایک اور چھاپہ مارا گیا۔ عہدیداروں نے بتایا کہ یہ شخص ایک سرکاری ملازم ہے جو محکمہ زراعت میں کام کرتا ہے۔ذرائع نے بتایا کہ یہ چھاپے ایک مربوط آپریشن کے تحت متعدد مقامات پر بیک وقت مارے گئے اور ٹیمیں آپریشن کے دوران دستاویزات اور الیکٹرانک آلات کی جانچ کر رہی تھیں۔
