محتشم احتشام
پونچھ//محکمہ یوتھ سروس اینڈ سپورٹس ضلع پونچھ نے آرمی گراؤنڈ جھلاس میں ایک شاندار اور رنگا رنگ اسپورٹس میلہ منعقد کیا، جس میں 15 سے 29 برس کی عمر کے 650 سے زائد لڑکوں اور لڑکیوں نے جوش و خروش کے ساتھ شرکت کی۔ اس میلے کی خاص بات یہ رہی کہ لائن آف کنٹرول اور سرحدی دیہات سے تعلق رکھنے والے نوجوانوں کی بڑی تعداد نے حصہ لے کر اپنی صلاحیتوں کا مظاہرہ کیا، جس سے یہ پروگرام حقیقی معنوں میں گراس روٹ اسپورٹس اور ہمہ گیر نوجوان شمولیت کی علامت بن گیا۔یہ اسپورٹس میلہ دیہی کھیلوں کے تہذیبی رنگ میں ڈھلا ہوا تھا، جس کا مقصد ضلع کے دور دراز اور سرحدی علاقوں کے نوجوانوں کو ایک مؤثر، متحرک اور مسابقتی پلیٹ فارم فراہم کرنا تھا۔نوجوان کھلاڑیوں نے مختلف کھیلوں میں اپنی فٹنس، تکنیکی مہارت، نظم و ضبط اور اسپورٹس مین اسپرٹ کا عملی مظاہرہ کیا۔یہ پروگرام انو رادھا گپتا (ڈائریکٹر جنرل، یوتھ سروسز اینڈ اسپورٹس، جموں و کشمیر) کی قیادت اور رہنمائی میں منعقد ہوا، جبکہ منقش کول(جوائنٹ ڈائریکٹر، جموں) اور میگا بھگویا (ڈپٹی ڈائریکٹر ایکٹیویٹیز) کی مسلسل معاونت حاصل رہی۔ ضلع سطح پر پروگرام کی نگرانی اور ہم آہنگی محمد قاسم ضلع یوتھ سروسز اینڈ اسپورٹس آفیسر، پونچھ نے کی، جبکہ وجے کمار شرما نے ایکٹیویٹی انچارج کے فرائض انجام دئیے۔اسپورٹس میلہ میں چیف گیسٹ کی حیثیت سے روہت سکسینہ، کمانڈنگ آفیسر 7 جاٹ، کرشنا گھاٹی بریگیڈ نے شرکت کی۔ ان کی حوصلہ افزا موجودگی نے نوجوان کھلاڑیوں کے حوصلے بلند کیے۔ اس موقع پر بھارتی فوج کی بھرپور معاونت نے سرحدی علاقوں میں کھیلوں اور نوجوانوں کی ترقی کے لئے مضبوط سول ملٹری اشتراک کو واضح کیا۔مقابلے ایک باقاعدہ سلیکشن کمیٹی کی نگرانی میں شفاف، منصفانہ اور منظم طریقے سے منعقد کئے گئے۔ کھلاڑیوں کی جانچ تکنیکی مہارت، جسمانی فٹنس، ٹیم ورک، نظم و ضبط اور میچ ٹیمپرامنٹ کی بنیاد پر کی گئی، تاکہ صلاحیتوں کا انتخاب مکمل طور پر میرٹ کی بنیاد پر ممکن ہو سکے۔اس کامیاب اسپورٹس میلہ نے جموں و کشمیر میں ڈی وائی ایس ایس پونچھ کے اس عزم کو مزید تقویت دی کہ سرحدی اور ایل او سی علاقوں کے نوجوانوں کو ان کی دہلیز پر کھیلوں کے مواقع فراہم کیے جائیں۔ ایسے دیہی اسپورٹس میلوں کے ذریعے نہ صرف پوشیدہ صلاحیتوں کی شناخت ممکن ہوتی ہے بلکہ صحت مند طرزِ زندگی، سماجی ہم آہنگی، نظم و ضبط اور قومی یکجہتی کو بھی فروغ ملتا ہے۔جھلاس جیسے سرحدی علاقوں میں کھیلوں کے انعقاد کے ذریعے ڈی وائی ایس ایس اپنے وژن اسپورٹس فار آل’’ کو عملی شکل دیتے ہوئے نوجوان کھلاڑیوں کے لیے اعلیٰ سطحی مقابلوں کی راہیں ہموار کر رہا ہے، جو مستقبل میں جموں و کشمیر کے کھیلوں کے منظرنامے کو مضبوط بنانے میں اہم کردار ادا کرے۔
