سمت بھارگو
راجوری//راجوری ضلع کے کوٹرنکہ کے بڈھال گاؤں میں پراسرار حالات کے سبب پیش آنے والے المناک واقعات میں 16 سالہ یاسمین کوثر دختر محمد اسلم اپنی چھ بہن بھائیوں میں واحد زندہ بچ جانے والی ہیں، کیونکہ ان کی تین بہنیں اور دو بھائی اتوار سے اب تک اس پراسرار بیماری کی وجہ سے انتقال کر چکے ہیں۔یاسمین اور ان کے پانچ بہن بھائی اتوار کے روز بیمار ہو گئے تھے، جس کے بعد انہیں سب ڈسٹرکٹ ہسپتال کنڈی میں داخل کیا گیا۔ وہاں سے انہیں پہلے جی ایم سی ایسوسی ایٹڈ ہسپتال راجوری اور پھر جی ایم سی کے جموں ایس ایم جی ایس ہسپتال منتقل کیا گیا۔حکام کے مطابق یاسمین کی حالت تشویشناک ہے اور وہ اس وقت جموں کے ایس ایم جی ایس ہسپتال میں وینٹی لیٹر پر ہیں۔یاسمین کے پانچ بہن بھائی، جن میں ظہور احمد (14)، نبینہ کوثر (6)، محمد معروف (8)، صفینہ کوثر (12)، اور زبینہ کوثر (10)، سبھی کی موت ہو چکی ہے۔یاسمین کے والد، محمد اسلم، نہ صرف اپنے پانچ بچوں کو کھو چکے ہیں بلکہ ان کے چچا اور چچی، محمد یوسف اور جٹی بیگم، جو ان کے گھر میں مقیم تھے، بھی اس سانحے میں چل بسے ہیں۔جمعہ کے روز، نائب وزیر اعلیٰ، سریندر چودھری نے جموں کے شالیمار ہسپتال کا دورہ کیا اور یاسمین کی صحت کے بارے میں معلومات حاصل کیں۔ ان کے ہمراہ ایم ایل اے بڈھال جاوید چودھری اور دیگر اعلیٰ افسران بھی موجود تھے۔اس دوران نائب وزیر اعلیٰ نے کہا کہ حکومت ان پراسرار اموات کے اسباب جاننے کے لئے جامع تحقیقات کر رہی ہے۔ انہوں نے ہسپتال انتظامیہ کو یاسمین کو تمام ممکنہ طبی سہولیات فراہم کرنے کی ہدایت دی۔انہوں نے کہا کہ پولیس اور دیگر ایجنسیاں بھی اس معاملے کی مکمل تحقیقات کر رہی ہیں اور اگر کسی قسم کی سازش یا بے ضابطگی پائی گئی تو ذمہ دار افراد کے خلاف سخت کارروائی کی جائے گی۔
