محمد تسکین
بانہال//سب ڈویژن بانہال کی تحصیل کھڑی کے پتھالن علاقے میں جنگلی درندوں کے ایک حملے میں بارہ بھیڑیں ہلاک ہوگئی جبکہ دو بھیڑیں زخمی ہوئی ہیں۔ اس کے علاؤہ ایک درجن کے قریب بھیڑیں جنگلی جانوروں کے حملے کے بعد لاپتہ ہوگئی ہیں۔ متاثرہ لوگوں نے کشمیر عظمی کو فون پر بتایا کہ جمعہ کی رات نوبجے پتھالن کی کھلی چراگاہوں میں رکھی گئی بھیڑوں پر جنگلی درندوں ، جو ممکنہ طور پر تیندوا ہوسکتا ہے نے حملہ کر دیا اور بارہ بھیڑوں کو چیڑ پھاڑ کرکے مار ڈالا جبکہ دو بھیڑیں زخمی ہوئی ہیں اور ایک درجن کے قریب بھیڑیں جنگلات میں لاپتہ ہوگئی ہیں۔ انہوں نے کہا کہ اس حملے میں ہلاک ہوئی بھیڑیں عبدالرحمان بٹ سکنہ بزلہ کھڑی ، محمد رمضان بٹ سکنہ بزلہ کھڑی ، عبداللطیف بٹ سکنہ بزلہ کھڑی اور منظور سود بکروال سکنہ ساول کوٹ ارناس کی ملیکت تھیں۔ متاثرہ زمینداروں کا کہنا ہے کہ یہ بھیڑیں منظور سود بکروال کے مال کے ساتھ چرنے کیلئے بھیجی گئی تھی اور جمعہ کی رات نو بجے جنگلی جانوروں نے ہلہ بول دیا اور بھاری نقصان پہنچایا۔ انہوں نے کہا کہ ایسا لگتا ہے کہ یہ جنگلی درندوں کا جھنڈ تھا جنہوں نے بڑے پیمانے پر غریب زمینداروں کو نقصان پہنچایا ہے۔مقامی چوکیدار عبدالرشید سوہل نے کشمیر عظمی کو بتایا کہ کھڑی تحصیل کے ترگام ، بزلہ ، پتھالن ، پتنالہ اور دیگر علاقوں میں جنگلی درندوں خاص کر تیندوں اور ریچھوں نے خوف و ہراس کا ماحول قائم کر رکھا ہے اور لوگوں کے جان و مال کو خطرہ لاحق لگا رہتا ہے۔ انہوں نے کہا کہ ایک ہفتہ قبل جنگلی جانوروں کے ایک حملے میں حبیب اللہ پڈر سکنہ پتنالہ کی تین گائیں اور محمد سلیمان پاچھو سکنہ پتنالہ کی دو گائیں جنگلی درندوں نے ہلاک کر ڈالی ہیں۔ مقامی لوگوں نے محکمہ وائلڈ لائف اور محکمہ مال کے حکام سے مطالبہ کیا ہے کہ وہ علاقے کا دورہ کرکے لوگوں کو پہنچے نقصانات کا جائزہ لیں اور متاثرین کو معاوضہ آدا کیا جائے۔ انہوں نے محکمہ وائلڈ لائف کھڑی اور بانہال کے حکام سے مطالبہ کیاکہ وہ علاقے میں خصوصی ٹیموں کو روانہ کریں تاکہ ان جنگلی درندوں کو جنگلوں کی طرف مار بھگایا جائے اور لوگوں کے جان و مال کو تحفظ فراہم کیا جائے۔
