عظمیٰ نیوز سروس
سرینگر//جوائنٹ ڈائریکٹر ایگریکلچر اِن پٹس نے پیر کو لالمنڈی میں کچن گارڈن اسکیم کے تحت معیاری سبزیوں کی پنیری (سیڈلنگز)کی فروخت کا باقاعدہ افتتاح کیا۔ اس موقع پر شہری اور مضافاتی علاقوں میں کچن گارڈن کے فروغ، تازہ سبزیوں میں خود کفالت اور پائیدار زرعی طریقوں کو بڑھاوا دینے کے عزم کا اعادہ کیا گیا۔یہ اقدام محکمہ کی جانب سے معیاری اور تصدیق شدہ پودوں کی مناسب اور سبسڈی شدہ نرخوں پر فراہمی کو یقینی بنانے کی مسلسل کوششوں کا حصہ ہے تاکہ عوام اپنے گھریلو باغات میں غذائیت سے بھرپور سبزیاں کاشت کرسکیں۔ یہ فروخت اور تقسیم مہم کچن گارڈن اسکیم کے وسیع تر پروگرام کا حصہ ہے، جس نے گھریلو سطح پر سبزیوں کی پیداوار میں اضافہ اور بازاروں پر انحصار میں کمی لانے میں اہم کردار ادا کیا ہے۔
تقریب میں ڈپٹی ڈائریکٹر (سنٹرل)قاضی شوکت، سیڈ پروڈکشن آفیسر اعجاز احمد میر اور محکمہ زراعت پیداوار و کسان فلاح کے کئی سینئر افسران بھی موجود تھے۔ ان کی شرکت نے کسان دوست اور عوامی فلاحی پروگراموں کے نفاذ میں محکمہ کے باہمی تعاون اور سنجیدگی کو اجاگر کیا۔اس موقع پر خطاب کرتے ہوئے جوائنٹ ڈائریکٹر ایگریکلچر اِن پٹس نے شہری زراعت اور صحت مند غذائی عادات کے فروغ کی اہمیت پر زور دیا۔ انہوں نے سرینگراور ملحقہ علاقوں کے کچن گارڈن رکھنے والے افراد سے اپیل کی کہ وہ اس موقع سے فائدہ اٹھائیں اور بروقت کاشت کے لیے معیاری پنیری حاصل کریں۔
