غلام نبی رینہ
کنگن/13 روز کے بعد لاپتہ نوجوان کی لاش وسن کنگن میں نالہ سندھ سے برآمد کرلی گئی ۔ بیلہ وسن کنگن میں منیر احمد شاہ ولد محبوب شاہ 26اپریل کو لاپتہ ہوگیا تھا جس کے بعد انہوں نے پولیس کو مطلع کیا ۔پولیس نے لاپتہ نوجوان کی تلاشی شروع کردی۔ کنگن پولیس ایس ڈی آر ایف گنڈ کنگن ایس ڈی آر ایف کیو آر ٹی مانسبل اور مقامی لوگ لاپتہ نوجوان کی لاش کو بازیاب کرنے کے لئے کاروائی شروع کردی لیکن 13روز کے بعد جمعہ کونوجوان کی لاش کو بیلہ وسن کے مقام پر نالہ سندھ سے برآمد کرلی گئی ۔ پولیس نے لاش کو قانونی لوازمات کے بعد لواحقین کے حوالے کر دی اوراس سلسلے میں کیس درج کرکے تحقیقات شروع کی۔ادھرسب ڈویڑنل مجسٹریٹ کنگن نے ایک فوری ایڈوائزری جاری کی ہے جس کا مقصد سب ڈویژن کے مختلف آبی ذخائر میں پانی کی سطح میں اضافے کے درمیان ڈوبنے کے واقعات کو روکنا ہے۔ایڈوائزری کے مطابق، حکام نے مشاہدہ کیا ہے کہ مناسب حفاظتی انفراسٹرکچر اور ریسکیو میکانزم کی عدم موجودگی کے باوجود، لوگوں کی بڑھتی ہوئی تعداد، جن میں نوجوان، بچے اور بزرگ شامل ہیں، نالہ سندھ، وانگٹھ نالہ، پی ڈی سی کینال اور باروالہ آبشار جیسے کھلے آبی ذخائر کے قریب جا رہے ہیں۔ایڈوائزری میں کہا گیا کہ تیراکی کی مصدقہ سہولیات اور حفاظتی انتظامات نہ ہونے کی وجہ سے یہ مقامات انتہائی غیر محفوظ ہیں، انہوں نے مزید کہا کہ ماضی میں ڈوبنے کے کئی المناک واقعات نے اس میں شامل خطرات کو اجاگر کیا ہے۔لوگوں کو سختی سے مشورہ دیا گیا ہے کہ وہ کسی بھی حالت میں کھلے پانی کے ذرائع میں داخل نہ ہوں، اس کے قریب نہ جائیں یا نہ کھیلیں۔
