عظمیٰ نیوز سروس
سرینگر//وزیرِ اعظم نریندر مودی نے جی-7 سمٹ کے دوران کینیڈا کے دورے پر البرٹا کی لیفٹیننٹ گورنر سلمی لکھانی کو کشمیر کا روایتی پیپرماشی باکس تحفے میں پیش کیا۔یہ پیپرماشی کا باکس جموں و کشمیر کی قدیم اور خوبصورت فنکاری کی ایک شاندار مثال ہے۔ یہ صرف ایک ڈبہ نہیں بلکہ ایک نفیس آرائشی فن پارہ ہے، جو کشمیری ہنرمندوں کی مہارت اور تخلیقی صلاحیتوں کا منہ بولتا ثبوت ہے۔اس فن میں سب سے پہلے سخت سازی (Sakhtsazi) کا مرحلہ ہوتا ہے، جس میں ری سائیکل شدہ کاغذ کی کئی تہوں کو سکھا کر ایک مضبوط ڈبہ بنایا جاتا ہے۔ اس کے بعد نقاشی (Naqashi) کا عمل آتا ہے، جہاں ہنرمند ہاتھوںسے خوبصورت ڈیزائن بناتے ہیں جن میں پھول، چنار کے پتے، پرندے اور دلکش مناظر شامل ہوتے ہیں۔روشن رنگوں اور سنہری نقش و نگار سے مزین یہ باکس نہ صرف ایک ثقافتی ورثہ ہے بلکہ دوستی اور ہندوستانی ہنر کا خوبصورت تحفہ بھی ہے۔
