یواین آئی
حیدرآباد/حیدرآبادی کرکٹرمحمد سراج عمرہ کیلئے روانہ ہوگئے ہیں۔ذرائع کے مطابق کل شب شہرحیدرآباد کے شمس آباد ایرپورٹ پراحرام میں عمرہ کیلئے روانگی کی ان کی ویڈیوزسوشیل میڈیا پرتیزی کے ساتھ وائرل ہوگئیں۔سراج جن کو کل سے پاکستان اوردبئی میں ہونے والی چیمپئینس ٹروفی میں ٹیم میں جگہ نہیں دی گئی ہے ،سفرمقدس کیلئے روانہ ہوئے ۔ویڈیوز میں دیکھاگیا ہے کہ سراج ایرپورٹ پر کارسے اترکراپنے رشتہ داروں سے روانگی کے موقع پر ملاقات کررہے ہیں۔ان کے ساتھ سفری دستاویزات بھی ہیں۔محمد سراج پہلی مرتبہ عمرہ کی ادائیگی کیلئے روانہ نہیں ہوئے بلکہ سال 2019میں انہوں نے اپنے والدین کے ساتھ بھی عمرہ کی ادائیگی کی تھی۔آئی پی ایل سیزن 2025اورماہ مقدس رمضان المبارک سے پہلے سراج نے عمرہ کی ادائیگی کو ترجیح دی۔محمد سراج ایک ایسے وقت عمرہ کررہے ہیں جب وہ اپنے کیرئیر کے مشکل دورسے گذررہے ہیں۔ 30 سالہ کرکٹر کو آئی سی سی چیمپئنس ٹرافی 2025 کے لیے ہندوستان کی 15 رکنی ٹیم میں جگہ نہیں دی گئی جس نے ان کے مداحوں اور ماہرین کو حیران کر دیا۔ صرف یہی نہیں رائل چیلنجرس بنگلورو نے بھی انہیں آئی پی ایل 2025 سے پہلے ریلیز کر دیا۔ سراج نے اس سال کے اوائل میں بارڈر-گواسکر ٹرافی سیریز میں آسٹریلیا کے خلاف آخری بار حصہ لیاتھا، جہاں انہوں نے شاندار کارکردگی کا مظاہرہ کیا۔ انہوں نے 10 اننگز میں 20 وکٹیں حاصل کیں اور سیریز میں ملک کے دوسرے سب سے زیادہ وکٹیں لینے والے گیند بازبنے تاہم، اس شاندار کارکردگی کے باوجود، وہ آئی سی سی ٹورنامنٹ کے لیے ہندوستانی اسکواڈ میں جگہ بنانے میں ناکام رہے ۔
