عظمیٰ نیوز سروس
راجوری// جموں و کشمیر بی جے پی کے نائب صدر اور سابق کابینہ وزیر چوہدری ذوالفقار علی نے پیر پنجال خطے میں جاری طویل اور غیر یقینی بجلی کٹوتیوں پر گہری تشویش کا اظہار کرتے ہوئے کہا ہے کہ سخت سردیوں کے موسم میں یہ صورتحال عوام کے لئے شدید مشکلات کا سبب بن رہی ہے۔ انہوں نے کہا کہ بجلی کی مسلسل بندش نے عام زندگی کو مفلوج کر دیا ہے اور لوگ بنیادی سہولت سے محروم ہو رہے ہیں۔چوہدری ذوالفقار علی نے ریحان، ترگائیں اور بدھل اسمبلی حلقہ کے ملحقہ دیہات کا دورہ کرنے کے بعد جاری بیان میں کہا کہ صبح سویرے اور شام کے اوقات میں، جب درجہ حرارت نقطہ انجماد سے نیچے چلا جاتا ہے، بجلی کی فراہمی بار بار معطل رہتی ہے جس سے عوام کو شدید پریشانی کا سامنا کرنا پڑتا ہے۔
انہوں نے کہا کہ بزرگوں، بچوں اور مریضوں کے لئے یہ صورتحال انتہائی تکلیف دہ ہے۔سابق وزیر نے اس امر پر بھی افسوس کا اظہار کیا کہ طویل بجلی کٹوتیوں کے باوجود صارفین کو مبالغہ آمیز بجلی بل موصول ہو رہے ہیں، جس سے پہلے ہی مشکلات کا شکار گھریلو بجٹ پر مزید بوجھ پڑ رہا ہے۔ انہوں نے اسے سراسر ناانصافی قرار دیتے ہوئے کہا کہ عوام کو سہولت دینے کے بجائے ان پر اضافی مالی دباؤ ڈالا جا رہا ہے۔چوہدری ذوالفقار علی نے جموں و کشمیر حکومت سے مطالبہ کیا کہ خاص طور پر سردیوں کے دوران بجلی کی بلا رکاوٹ فراہمی کو یقینی بنایا جائے، بالخصوص نماز کے اوقات اور بچوں کے مطالعے کے وقت بجلی دستیاب ہونی چاہیے۔ انہوں نے کہا کہ پہاڑی اور برف پوش علاقوں میں بجلی محض سہولت نہیں بلکہ بنیادی ضرورت بن چکی ہے۔طویل مدتی حل پر زور دیتے ہوئے انہوں نے چناب ندی کے معاون دریاؤں سے ہائیڈرو پاور کی صلاحیت کو بروئے کار لانے کی فوری ضرورت پر بھی روشنی ڈالی۔ ان کا کہنا تھا کہ اگر ان وسائل کو درست طریقے سے استعمال کیا جائے تو پیر پنجال میں بجلی بحران پر قابو پایا جا سکتا ہے۔انہوں نے خراب سڑکوں، ناقص رابطہ نظام، پینے کے پانی کی قلت اور کئی دور دراز علاقوں میں راشن کی کمی جیسے دیگر شہری مسائل کی بھی نشاندہی کی۔ انہوں نے حکومت پر بے حسی کا الزام عائد کرتے ہوئے کہا کہ عوامی مینڈیٹ کے باوجود پیر پنجال کے دیرینہ مسائل کو نظرانداز کیا جا رہا ہے۔ سابق وزیر نے مطالبہ کیا کہ حکومت فوری اور سنجیدہ اقدامات کرے تاکہ علاقے کے عوام کو حقیقی معنوں میں راحت مل سکے۔
