وادی کے کاروباریوں کو درپیش مشکلات کاازالہ

سرینگر//جموں کشمیر بینک وادی کے کاروباریوں کو درپیش مشکلات کاازالہ کرنے کیلئے بینکنگ ضابطہ کے دائرہ اختیار میں تمام اقدام کرے گا۔اس بات کی یقین دہانی جموں کشمیر بینک کے چیئرمین ومنیجنگ ڈائریکٹر راجیش کمار چھبر نے وادی کشمیرسے تعلق رکھنے والے سرکردہ تجارتی انجمنوں کے ایک اعلیٰ سطحی وفد کے ساتھ ملاقات کے دوران کی۔چیئرمین نے وفد کو چیف سیکریٹری بی وی سبھرامنیم کی صدارت میں منعقدہUTLBCمیٹنگ میں جے کے بینک کی کارکردگی کے بارے میں مطلع کیا،جس میں بڑے کاروباریوں اورصحت مندقرضوں کو بازآبادکاری پیکیج میں لانے کی سفارش کی گئی ہے اوراس مراعاتی پیکیج کوحال ہی میں جموں کشمیر سرکار نے بھی اُٹھایا ہے جس میں لیفٹنٹ گورنرجی سی مرموکارول نمایاں رہا ہے ۔بینک کی مضبوط مالی حالت پر تبصرہ کرتے ہوئے جے کے بینک چیئرمین نے کہا کہ یہ بینک ڈیپازٹ اور ایڈوانسز میں 15فی صد شرح ترقی پر ہے اور یہ ترقی کاروباری حلقے کے تعاون سے ہی ممکن ہے نیز ہم یو نین ٹریٹری کی ہمہ جہت ترقی کیلئے ہمیشہ کوشاں رہیں گے۔ د ریں اثناء چیئرمین نے کاروباریوں کو بنیادی بینکنگ خدمات میں در پیش مشکلات کے ازالے کیلئے موقع پر ہی  ہدایات جاری کیں۔کشمیر چیمبر آف کامرس اینڈ انڈسٹری کے صدر شیخ عاشق نے کاروباری طبقے اور جموں وکشمیر بینک کے آپسی انحصار پر روشنی ڈالی اور تجارتی شعبے کو در پیش مشکلات کے بارے میں آگاہی دیدی۔ انہوں نے بینک قیادت سے درخواست کی کہ وہ یہاں در پیش کاروباری مشکلات پر قابو پانے میں اُنکی مدد کریں۔  وفد سے وابستہ دیگر ممبران نے بھی کئی مسائل پر تفصیلاً روشنی ڈالی اور بینک سے درخواست کی کہUTLBCکی سفارشات کو دوبارہ آر بی آئی کے ساتھ اٹھائیں۔وفدمیںکشمیر چیمبر آف کامرس اینڈ انڈسٹری، کشمیر ٹریڈرس ایند منیو فکچرس فیڈریشن، کشمیر اکانامک الائنس، کشمیر کارپٹ منیو فکچرس ایسو سی ایشن، کشمیر ہوٹل اینڈ ریسٹورنٹ اونرس فیڈریشن، جموں اینڈ کشمیر ہوٹلئرس کلب، جے اینڈ کے ٹورزم الائنس، ایسو سی ایٹڈ کشمیر ٹور آپریٹرس، کشمیر انڈسٹریز ایسو سی ایشن رنگریٹ، کشمیر انڈسٹرئل ریوایول اینڈ ڈیولپمنٹ فورم، پرایئویٹ سکولز ایسو سی ایشن، پی ایچ ڈی چیمبر آف کامرس اینڈ انڈسٹریز کشمیر چپٹر، شہرِ خاص ٹریڈرس ایسو سی ایشن، کشمیر کیمسٹس اینڈ ڈرگسٹس ایسو سی ایشن،  دست کار ری ہیبلی ٹیشن فورم، آئی جی سی لاسی پورہ، کشمیر یوتھ انٹر پرائنر  فورم اور جے اینڈ کے حج و عمرہ ایسو سی ایشن کے نمائندوں نے شرکت کی۔ وفد میں شامل تمام اراکین نے بینک چیئرمین اور انکی انتظامیہ کی سنجیدہ گوش گزاری پر انکا شکریہ ادا کیا۔