عظمیٰ نیوز سروس
سرینگر// پہلگام حملے کے بعد وادی میں سیاحت کو فروغ دینے کے لیے بدھ کو یہاںڈل جھیل میں شکارا ریس کا انعقاد کیا گیا۔حکام نے بتایا کہ جموں و کشمیر کی وزیر تعلیم سکینہ ایتو نے دوڑ کو جھنڈی دکھا کر روانہ کیا، جس کا اہتمام چندی گڑھ میں قائم آرینزگروپ آف کالجز نے کیا تھا۔ڈاکٹر انشو کٹاریہ، چیئرمین، آرینز گروپ نے تقریب کی صدارت کی۔ تقریباً 50 شکاروں نے “کشمیر میں آریائیز آپ کا استقبال” کے تھیم پر ریس میں حصہ لیا۔یہ ریس جموں و کشمیر کے سیاحتی شعبے کو فروغ دینے کے لیے منعقد کی گئی تھی۔اس موقع پر خطاب کرتے ہوئے ایتو نے کہا کہ یہ منفرد اقدام جموں و کشمیر کی سیاحتی صلاحیت کو قومی اور بین الاقوامی سطح پر فروغ دینے میں معاون ثابت ہوگا۔انہوں نے کہا”یہ ریس صرف ایک تقریب نہیں ہے، یہ ہمارے جموں و کشمیر کے امن، اتحاد اور بے مثال خوبصورتی کا جشن ہے۔ اس طرح کی سرگرمیوں کو فروغ دینے سے جموں و کشمیر کے ارد گرد نئی داستانیں تخلیق کرنے میں مدد ملتی ہے، مثبت توجہ مبذول ہوتی ہے اور سیاحت کو فروغ ملتا ہے،” ۔وزیر نے ادارے کے طلبا اور انتظامیہ کی تعریف کرتے ہوئے کہا کہ اس نے دہشت گردی کے حملے کے بعد مثبت کردار ادا کیا ہے۔منتظمین نے کہا کہ کشمیر زمین پر ایک جنت ہے اور ہمیشہ رہے گا، جو منفی واقعات سے متاثر نہیں ہوگا۔
