جاوید ڈارکی ورچیول پروگرام میں شرکت، سکاسٹ کشمیر تقریب
عظمیٰ نیوز سروس
سرینگر//وزیر اعظم نریندر مودی نے ہفتہ کو تارکیشور میں منعقدہ ایک تقریب کے دوران پردھان منتری کسان سمان ندھی (پی ایم-کسان) اسکیم کی 23ویں قسط جاری کر دی۔ اس قسط کے تحت ملک بھر کے 9.44 کروڑ سے زائد کسان خاندانوں کے بینک کھاتوں میں ڈائریکٹ بینیفٹ ٹرانسفر (ڈی بی ٹی) کے ذریعے 18,880 کروڑ روپے سے زیادہ کی رقم منتقل کی گئی۔ 23ویں قسط کے اجرا کے بعد اس اسکیم کے تحت کسانوں کو فراہم کی جانے والی مجموعی مالی امداد 4.28 لاکھ کروڑ روپے سے تجاوز کر گئی ہے، جس سے یہ دنیا کی سب سے بڑی براہِ راست مالی امداد فراہم کرنے والی اسکیموں میں شمار ہوتی ہے۔
تقریب کے دوران وزیر اعظم نے مغربی بنگال کے لیے کئی اہم ترقیاتی منصوبوں کا بھی اعلان کیا۔اس دوران زراعت ،دیہی ترقی و پنچایتی راج کے وزیرجاوید احمد ڈار نے کل شیر کشمیر یونیورسٹی آف ایگری کلچرل سائنسز اینڈ ٹیکنالوجی کشمیر (سکاسٹ کشمیر) میں پردھان منتری کسان سمان ندھی (پی ایم۔کے آئی ایس اے این) کی 23ویں قسط کے اجرا کا موقعہ پرمنعقدہ ورچوئل پروگرام میں شرکت کی۔جموں و کشمیر میں پی ایم کسان سکیم کے آغاز سے اَب تک تقریباً 4,209.82 کروڑ روپے کی رقم کامیابی کے ساتھ 9.17 لاکھ استفادہ کنندگان میں تقسیم کی جا چکی ہے جس سے زرعی کمیونٹی کو اہم مالی مدد فراہم ہوئی ہے۔اِس موقعہ پر جاوید احمد ڈار نے تقریب سے خطاب کرتے ہوئے کہا کہ پی ایم۔کسان کسانوں کو یقینی مالی تعاون فراہم کرنے اور دیہی معیشت کو مستحکم کرنے کے لیے ایک انقلابی اقدام کے طور پر ابھری ہے۔ اْنہوںنے کہا کہ اقساط کی بروقت ادائیگی سے کسانوں کو زرعی اخراجات پورے کرنے، بہتر کاشتکاری طریقے اَپنانے اور زرعی سرگرمیاں زیادہ مؤثر طریقے سے انجام دینے میں مدد ملتی ہے۔اْنہوں نے اس بات کا اعادہ کیا کہ پی ایم کسان سمان ندھی یوجنا کے تحت اہل کسانوں کو سالانہ 6,000 روپے تین برابر قسطوں میں 2,000 روپے فی قسط کے حساب سے براہ راست ان کے بینک کھاتوں میں ڈِی بی ٹی نظام کے ذریعے منتقل کئے جاتے ہیںجس سے سروس کی فراہمی میں شفافیت، جوابدہی اور کارکردگی کو یقینی بنایا جاتا ہے۔اِس موقعہ پر” کھیت بچائو ابھیان” اور” فارمرز سکیم گائیڈ” کے عنوان سے دو اشاعتیں بھی جاری کی گئیں۔
