معراج العالم عقیدت و احترام کیساتھ منایا گیا

سرینگر// ٹنل کے آر پار ِ 2برسوں کے بعد کورونا احتیاتی تدابیر کی پاسداری کرتے ہوئے معراج العالم کی تقریبات عقیدت واحترام سے منائی گئیں۔ اس سلسلے میں وادی کی مساجد اور خانقاہوں میں شب خوانی ہوئی اور لوگ اللہ کے حضور سربسجود ہو کر درود اذکار میں محو رہے۔ وادی میں شب معراج کی سب سے بڑی تقریب درگاہ حضرتبل میں منعقد ہوئی ،جہاں شہر سرینگر سمیت وادی کے اطراف واکناف سے آئے ہوئے ہزاروں کی تعداد میں عقیدتمند درگاہ حضرت بل میں جمع ہوئے اور وہ شب خوانی میں محو رہے جبکہ زائرین نے یہاں درودواذکار کی محفلیں آراستہ کیں جس کے ساتھ ہی حضرت بل کا علاقہ دروداذکار سے گونجنے لگا۔درگاہ حضرتبل کے راستوں کو چراغاں کیا گیاتھا۔ معراج عالم کے سلسلے میںدرگاہ حضرت بل میں منعقدہ تقریب کے دوران ہزاروں عقیدتمند رات بھر توبہ و استغفار ،درود اذکار، نعت خوانی اور وعظ وتبلیغ کی مجالس میں محو رہنے کے بعد منگل کو نماز فجر ادا کرنے کے بعدموئے مقدس کے دیدار سے فیضیاب ہوئے۔انتظامیہ نے زائرین کو درگاہ حضرت بل اور دیگر مقدس مقامات تک لانے اور لیجانے کیلئے ٹرانسپورٹ کے علاوہ پانی اور بجلی کے مناسب انتظامات کئے تھے جبکہ کئی رضاکار تنظیموں نے زائرین کی سہولیات کیلئے خصوصی کیمپ لگا دئے تھے۔ زائر ین کو درگاہ تک پہنچانے کیلئے ٹرانسپورٹ کے خصوصی انتظامات کئے گئے تھے۔ درگاہ حضرتبل میںپیر کی شام نماز عشا ٹھیک ساڑھے 10بجے ادا کی گئی جس کے بعد وہاں ختمات المعظمات اور توبہ و استغفار کی مجالس آراستہ ہوئیں۔ نہ صرف سرینگر بلکہ وادی کے دیگر اضلاع سے تعلق رکھنے والے لوگوں نے درگاہ میں شب خوانی کی۔ اس ضمن میں درگاہ میں گاڑیوں کی غیر معمولی نقل و حمل نظر آئی جن میں مختلف اضلاع سے عقیدتمندوں کو لیکر آنے والی گاڑیاں بھی شامل تھیں۔ شب خوانی کے بعدمنگل کو نماز فجر کے موقعہ پر زائرین کی ایک بڑی تعداد موئے پاک ؐکی زیارت سے فیضیاب ہوئی۔ اس موقعہ پر درود سلام سے پورا حضرتبل علاقہ گونجتا رہا۔ شب خوانی میں خواتین کی بڑی تعداد موجود تھی۔ مجلس میں ہر عقیدتمند کی آنکھیں پْر نم تھی اور ان کے آنکھوں سے آنسو ٹپک رہے تھے ۔ان تقریبات کیلئے پولیس کے علاوہ کئی غیر سرکاری محکموں ، مسلم وقف بورڈ اور محکمہ صحت نے عقیدت مندوں کیلئے کھانے پینے کے چیزوں کا انتظام کیا تھاجبکہ زائرین کو کئی ایک مقامات پر زائرین کے لئے ایس آر ٹی سی کی گاڑیاں وقف رکھی گئی تھیں جو زائرین کو درگاہ حضرتبل لانے اور لیجانے کے لئے استعمال ہوئیں۔ درگاہ جانے والے زائرین کیلئے سٹیٹ روڈ ٹرانسپورٹ کارپوریشن کی طرف سے خصوصی گاڑیوں کا انتظام کیاگیا تھاجبکہ جگہ جگہ رضاکار تنظیموں کی طرف سے لوگوں کیلئے مشروبات کا بھی انتظام تھا۔ اس حوالے سے تمام طرح کی تیاریاں کی گئیں۔انتظامیہ نے ان کیمپوں کو سڑکوں سے دور پارکوں اور کھلی جگہوں پر نصب کرنے کی ہدایت دی تھی تاکہ درگاہ آنے والے زائرین کو کسی بھی قسم کی مشکلات کا سامنا نہ کرنا پڑے۔ معراج تقریب کے موقع پر شہر سرینگر اور تمام تحصیل وصدر مقامات پر بھی لوگوں نے شب خوانی کی۔ جامع مسجد سرینگر ، چرار شریف، آثار شریف شہری کلاش پورہ ، زیارت مخدوم صاحب سرینگر، خانقاہ معلی، جناب صاحب صورہ ، زیارت دستگیر صاحب ،سرائے بالا سرینگر، مسجد مدنی رعناواری ، کھرم سرہامہ ، آثار شریف پنجورہ ، اہم شریف بانڈی پورہ ،حشرو چاڈورہ، پانزن ،دیو باغ ، واگام ،نمتہ ہال ، کانیرہ ،رانگر ، زوہامہ ، زیارت خواجہ ہلال نسبل سمبل اور درگاہ عالیہ بارہمولہ میں بھی اس شب کی مناسبت سے خصوصی مجالس کا اہتمام کیا گیا جبکہ دیگر قصبوں میںاور دیہی علاقوں میں بھی اس حوالے سے بھی تقاریب اور خصوصی روح پرور مجالس کا اہتمام ہوا۔