لاہور/پاکستان اور آسٹریلیا کے درمیان لاہور میں جاری سیریز کے آخری ٹیسٹ میچ میں مہمان ٹیم نے پہلے دن کھیل کے اختتام پر 5وکٹوں کے نقصان پر 232رنز بنالئے ہیں۔ قذافی اسٹیڈیم میں جاری سیریز کے فیصلہ کن میچ میں آسٹریلیا کے کپتان پیٹ کمنز نے ٹاس جیت کر پہلے بیٹنگ کرنے کا فیصلہ کیا تھا۔ آسٹریلوی ٹیم کی بیٹنگ شاہین شاہ آفریدی کے ابتدائی اوورز میں شدید دباؤ کا شکار رہی اور ایک ہی اوور میں مہمان ٹیم نے 2 وکٹ گنوادیں۔شاہین شاہ آفریدی نے 7رنز بنانے والے اوپنر ڈیوڈ وارنر اور ان کے بعد آنے والے مارنس لبوشین کو صفر کے اسکور پر پویلین روانہ کیا۔عثمان خواجہ اور اسٹیو اسمتھ نے 8 رنز پر 2 وکٹ گرجانے کے بعد لڑکھڑاتی ہوئی بیٹنگ کو سہارا دیا اور کھانے کے وقفے تک مزید کسی نقصان کے بغیر اسکور کو 70 رنز تک پہنچایا۔دن کے تیسرے سیشن میں نسیم شاہ نے اسمتھ کی قیمتی وکٹ حاصل کی وہ 146کے مجموعے پر 59 رنز بنا کر آؤٹ ہوئے۔پہلے دن کا تیسرا سیشن اس وقت پاکستانی ٹیم کے حق میں گیا جب 91رنز بنانے والے عثمان خواجہ نروس نائنٹیز کا شکار ہوکر ساجد خان کی گیند پر آؤٹ ہوئے، انہیں کپتان بابر اعظم نے کیچ پکڑ کر پویلین لوٹایا۔ بولرز نے نئی گیند سے ایک مرتبہ پھر ردھم دکھاتے ہوئے پانچویں آسٹریلوی کھلاڑی کو بھی پویلین بھیجا، اس مرتبہ آؤٹ ہونے والے بلے باز ٹریوس ہیڈ تھے جو 26رنز بنا کر نسیم شاہ کا شکار بنے اور یوں 205رنز پر آدھی آسٹریلوی ٹیم پویلین لوٹی۔ پہلے روز جب کھیل کا اختتام ہوا تو کیمرون گرین 20 اور ایلکس کیری 8 رنز پر ناٹ آؤٹ تھے جو اگلے روز اپنی نامکمل اننگز دوبارہ شروع کریں گے۔ پاکستانی ٹیم کی جانب سے اب تک شاہین شاہ آفریدی اور نسیم شاہ 2، 2 جبکہ ساجد خان ایک وکٹ لے چکے ہیں۔
لاہور ٹیسٹ :پہلے دن آسٹریلیا کے 5 وکٹوں پر 232رنز
