اشتیاق ملک
ڈوڈہ //ڈوڈہ ضلع کی تحصیل بھلیسہ کے گاؤں سنوارہ میں زمینی تنازعہ کو لے کر چھوٹے بھائی کے ہاتھوں بڑے بھائی کا قتل ہوا۔ اطلاعات کے مطابق ہفتہ کی صبح سب ڈویژنل ہیڈکواٹر گندوہ سے 13 کلومیٹر کی دوری پر واقع گاؤں سنوارہ میں دو بھائیوں کے درمیان زمینی تنازعہ کو لے کر جھگڑا ہوا۔اس دوران امتیاز احمد (34سال)ولد نذیر احمد نے اپنے بڑے بھائی اشتیاق احمد (48سال)پر حملہ کیا جو شدید زخمی ہوا۔اس واقعہ کے فوراً بعد مقامی لوگ و پولیس کی ٹیم موقع پر پہنچی اور زخمی شخص کو سب ضلع ہسپتال گندوہ منتقل کیا جہاں پر ابتدائی علاج معالجہ کے بعد اسے جی ایم سی ڈوڈہ کیلئے روانہ کیاگیا تاہم راستے میں ہی وہ دم توڑ گیا جس کے بعد اس کا سب ضلع ہسپتال گندوہ میں پوسٹ مارٹم کرکے لاش کو وارثین کے سپرد کیا گیا۔واضح رہے کہ اشتیاق احمد پیشہ سے ٹیچر تھا جبکہ امتیاز احمد پولیس میں بطور ایس پی او تعینات ہے۔ایس ڈی پی او گندوہ عادل ریشو نے کشمیر عظمیٰ کو بتایا کہ اس ضمن میں ایف آئی آر زیر نمبر 88/2023زیردفعہ307,323,447 آئی پی سی درج کر کے دو افراد کو گرفتار کر لیا گیا ہے اور مزید تحقیقات شروع کی گئی ہے۔
