سمت بھارگو
راجوری//چھ دن تک مسلسل بند رہنے کے بعد بالآخر تاریخی مغل روڈ کو ساتویں دن ٹریفک کے لئے بحال کر دیا گیا، جس سے پیر پنجال کے آر پار سفر کرنے والے ہزاروں مسافروں نے سکھ کا سانس لیا۔ سڑک کی بحالی کے بعد نہ صرف راجوری اور پونچھ بلکہ شوپیان اور جنوبی کشمیر کے لوگوں کے لئے بھی آمد و رفت ایک بار پھر ممکن ہو گئی ہے۔حکام کے مطابق اتوار کی دوپہر بعد سڑک کے دونوں سروں سے صرف انہی گاڑیوں کو گزرنے کی اجازت دی گئی تھی جو گزشتہ کئی دنوں سے بفلیاز (پونچھ) اور ہیرپورہ (شوپیان) کے مقامات پر پھنس کر رہ گئی تھیں۔ جیسے ہی اجازت ملی، درجنوں گاڑیاں قطار در قطار اپنے اپنے منزلوں کی طرف روانہ ہو گئیں، جس سے مسافروں میں خوشی کی لہر دوڑ گئی۔اتوار کی صبح سے دوپہر تک سڑک کا تفصیلی معائنہ کیا گیا، جس میں یہ بات سامنے آئی کہ دھوپ نکلنے کے بعد برف کی وجہ سے پیدا ہونے والی پھسلن میں نمایاں کمی آئی ہے۔ سڑک کی سطح بہتر ہونے کے بعد حکام نے مرحلہ وار ٹریفک بحال کرنے کا فیصلہ کیا، تاکہ مسافروں کی حفاظت کو یقینی بنایا جا سکے۔محکمہ انتظامیہ کے افسران نے بتایا کہ پیر کے روز سے مکمل پیمانے پر دونوں اطراف سے ٹریفک کی اجازت دے دی جائے گی، جس کے بعد عام مسافر گاڑیاں، مال بردار ٹرک اور دیگر ضروری سروسز معمول کے مطابق چل سکیں گی۔ ان کا کہنا تھا کہ سڑک کی حالت پر مسلسل نظر رکھی جا رہی ہے اور کسی بھی ہنگامی صورتحال سے نمٹنے کے لئے عملہ متحرک رکھا گیا ہے۔
