عظمیٰ نیوز سروس
ریاسی//نشہ مکت جموں و کشمیر ابھیان کے تحت ریاسی پولیس نے منشیات کے خلاف جاری مہم میں ایک اور اہم کامیابی حاصل کرتے ہوئے ایک خاتون کو افیون سمیت گرفتار کر لیا ہے۔ پولیس کے مطابق گرفتار خاتون کے قبضے سے بھاری مقدار میں افیون برآمد کی گئی، جس کے بعد اس کے خلاف این ڈی پی ایس ایکٹ کے تحت مقدمہ درج کر کے مزید تحقیقات شروع کر دی گئی ہیں۔پولیس ذرائع کے مطابق پولیس پوسٹ ڈیرہ بابا کی ایک ٹیم معمول کی ناکہ چیکنگ اور گشت کے دوران بھبھر برہمنہ کے قریب تعینات تھی۔ اسی دوران پولیس اہلکاروں نے ایک مشتبہ خاتون کو روک کر اس کی تلاشی لی۔
تلاشی کے دوران خاتون کے قبضے سے 102.370 گرام افیون برآمد ہوئی۔گرفتار خاتون کی شناخت جتیندر کور زوجہ گربچن سنگھ سکنہ کھیروڑ، بھبھر، ریاسی کے طور پر کی گئی ہے۔ پولیس نے برآمد شدہ منشیات کو موقع پر ہی تمام قانونی کارروائی مکمل کرتے ہوئے ضبط کر لیا۔پولیس نے بتایا کہ اس سلسلے میں پولیس اسٹیشن ریاسی میں ایف آئی آر نمبر 99/2026 زیر دفعہ 8/18 این ڈی پی ایس ایکٹ درج کی گئی ہے اور معاملے کی مزید تحقیقات جاری ہیں۔ حکام اس بات کا پتہ لگانے کی کوشش کر رہے ہیں کہ برآمد شدہ افیون کہاں سے لائی گئی تھی اور اس کے پیچھے کوئی منظم منشیات نیٹ ورک سرگرم تو نہیں۔ریاسی پولیس نے کہا کہ ضلع بھر میں منشیات کے خلاف مہم کو مزید سخت کیا جا رہا ہے تاکہ نوجوان نسل کو اس خطرناک لعنت سے محفوظ رکھا جا سکے۔ پولیس حکام نے عوام سے بھی اپیل کی کہ وہ اپنے علاقوں میں منشیات فروشی یا نشہ آور اشیاء سے متعلق کسی بھی سرگرمی کی اطلاع فوری طور پر پولیس کو دیں تاکہ ایسے عناصر کے خلاف مؤثر کارروائی عمل میں لائی جا سکے۔پولیس نے واضح کیا کہ منشیات کے کاروبار میں ملوث افراد کے خلاف سخت کارروائی جاری رہے گی اور معاشرے کو منشیات سے پاک بنانے کے لیے ہر ممکن قدم اٹھایا جائے گا۔
