دودھ، گوشت اور دیگر اشیا ئے خوردنی | معیار کی سخت نگرانی کرنے کی ہدایت

سرینگر// گوشت اور دیگر کھانے پینے کی اشیا کے کوالٹی کنٹرول سے متعلق ایک میٹنگ کی صدارت کرتے ہوئے، ڈویژنل کمشنرپی کے پولے نے گوشت، دودھ اور دیگر کھانے پینے کی اشیا کے معیار کی نگرانی کے لیے طویل مدتی میکانزم قائم کرنے پر زور دیا۔ انہوںنے فوڈ اینڈ ڈرگ کنٹرول ڈیپارٹمنٹ کے افسران کو ہدایت کی کہ وہ دودھ کی کوالٹی چیکنگ کو کثرت سے چلائیں اور معمول کی بنیاد پر جمع کئے گئے نمونوں کی چھان بین کریں۔فوڈ اینڈ ڈرگ کنٹرول افسران نے میٹنگ میں بتایا کہ محکمہ روزانہ دودھ اور دیگر کھانے پینے کی اشیا کے نمونے جمع کر کے اجزا اور معیار کی مناسب جانچ کے لیے لیبارٹری بھیج رہا ہے۔ انہوں نے بتایا کہ محکمہ کے پاس دودھ اور دیگر کھانے پینے کی اشیا کی کوالٹی جانچنے کرنے کے لیے تین موبائل ٹیسٹنگ وین اور ایک سٹیٹک لیب ہے۔اس دوران صوبائی کمشنرنے موبائل وینز پر GPS سسٹم لگانے کی ہدایت کی تاکہ ان کے مقام کی نگرانی کی جا سکے۔ انہوں نے انہیں یہ بھی ہدایت کی کہ وہ کارروائی کی ہفتہ وار رپورٹ مرتب کریں اور مختلف مقامات بالخصوص سری نگر شہر کے داخلی راستوں پر دودھ کی سرپرائز ٹیسٹنگ کا پیشگی منصوبہ تیار کریں۔اس کے علاوہ، انہوں نے ان سے کہا کہ وہ ہر ماہ ٹیسٹنگ کی تعداد کو دوگنا کریں اور بھرپور معیار کی جانچ پڑتال کریں۔ڈویژن کام کو بتایا گیا کہ محکمہ نے غلطی کرنے والے افراد سے 17 لاکھ روپے جرمانہ وصول کیا ہے جبکہ متعدد افراد کے خلاف مقدمات بھی درج کیے گئے ہیں۔