عظمیٰ نیوز سروس
سرینگر// جموں و کشمیر میں جنسی جرائم سے نمٹنے والی فاسٹ ٹریک عدالتوں میں سزا کی کم شرح ریکارڈ کی گئی ہے۔سرکاری اعداد و شمار کے مطابق 2024 میں سزائوں کی شرح 4.5 فیصد تک گر گئی یہاں تک کہ خصوصی عدالتوں نے سینکڑوں مقدمات کو نمٹا دیا۔ حکومت نے 18 دسمبر 2025 کو راجیہ سبھا کو بتایا کہ جموں و کشمیر میں اس وقت چار فاسٹ ٹریک خصوصی عدالتیں ہیں، جن میں دو خصوصی POCSO عدالتیں ہیں۔ مرکزی اسپانسرڈ سکیم کے آغاز کے بعد سے، ان عدالتوں نے یونین ٹیریٹری میں 286 مقدمات کو نمٹا دیا ، جن میں جنسی جرائم سے بچوں کے تحفظ کے قانون کے تحت 161 مقدمات شامل ہیں۔ جموں و کشمیر میں سزا سنانے کی شرح 2023 میں 6 فیصد رہی اور 2024 میں مزید کم ہو کر 4.5 فیصد رہ گئی۔جموں و کشمیر کے اعداد و شمار کو قومی تناظر میں رکھتے ہوئے، حکومت نے کہا کہ اس نے NCRB کی کرائم ان انڈیا 2023 کی رپورٹ کا جائزہ لیا ہے، جس میں IPC جرائم کے لیے مجموعی طور پر چارج شیٹنگ کی شرح 72 فیصد اور سزا کی شرح 54 فیصد ظاہر کی گئی ہے۔ وزارت نے کہا کہ سزا کے نتائج کا بہت زیادہ انحصار تفتیش کے معیار، شواہد اور ٹرائلز کی رفتار پر ہوتا ہے۔قومی سطح پر، 745 فاسٹ ٹریک خصوصی عدالتیں، بشمول 404 خصوصی POCSO عدالتیں، 31 مارچ 2025 تک 30 ریاستوں اور مرکز کے زیر انتظام علاقوں میں کام کر رہی تھیں۔جموں و کشمیر ان خطوں میں شامل تھا جہاں فاسٹ ٹریک عدالتوں کی موجودگی کے باوجود مسلسل کم سزائیں ملتی ہیں۔
