سید امجد شاہ
جموں// اوپن بیلٹ ووٹنگ کے خلاف کانگریس پارٹی کے کونسلروں کے احتجاج کے درمیان بی جے پی کے دو کونسلروں کو جموں میونسپل کارپوریشن کا میئر اور ڈپٹی میئر منتخب کیا گیا۔اس انتخاب میںبی جے پی کے کونسلروں راجندر شرما اور بلدیو سنگھ بلوریہ کو بالترتیب جے ایم سی کا نیا میئر اور ڈپٹی میئر منتخب کیا گیا۔ اپوزیشن کونسلروں کے نعرے اور احتجاج کے درمیان کانگریس پارٹی کے کونسلروں نے انتخابات کا بائیکاٹ کیا۔اپوزیشن کونسلروں کے مطابق ووٹنگ کے طریقہ کار میں تبدیلی کے خلاف احتجاج کیا گیا جس میں ووٹ خفیہ رائے شماری کے ذریعے نہیں بلکہ کھلے بیلٹ کے ذریعے ہوئی۔کونسلروں کے کل 59 ووٹوں میں سے میئر کے عہدے کے لیے راجندر شرما کو 57 ووٹ ملے اور کانگریس پارٹی کے ان کے مدمقابل دوارکا ناتھ چودھری کو صرف ایک ووٹ (میئر کے عہدے کیلئے) ملا جب کہ ایک ووٹ مسترد کیاگیا۔دوسری طرف بی جے پی کونسلر بلدیو سنگھ بلوریہ جے ایم سی کے ڈپٹی میئر کے طور پر منتخب ہوئے اور انہوں نے اس عہدے کے لیے اپنی مخالف سونیکا شرما کو شکست دی۔ شرما کا تعلق بھی کانگریس پارٹی سے تھا۔خیال رہے کہ جے ایم سی میں بی جے پی کے 44 کونسلر ہیں اور کانگریس پارٹی کے 75 ممبران کارپوریشن میں 13 کونسلر ہیں۔
