نئی دہلی//جسٹس این وی رمنا سپریم کورٹ کے 48ویں چیف جسٹس بن گئے ہیں ۔ جسٹس این وی رمنا نے سنیچر کو حلف اُٹھایا ۔ صدر رام ناتھ کوند نے موصوف کو 6 اپریل کو نیا چیف جسٹس مقرر کیا تھا ۔صدرکووند نے سبکدوش ہونے والے چیف جسٹس بوبڈے کی سفارش کو قبول کرتے ہوئے یہ احکام جاری کئے تھے۔بوبڈے 23اپریل کو سبکدوش ہوگئے۔جسٹس این وی رمنا 26اگست 2022 کو اس عہدے سے سبکدوش ہوں گے۔جسٹس رمنا آندھرا پردیش سے تعلق رکھنے والے دوسرے فرد ہیں جو ملک کی عدالت عظمی کے چیف جسٹس مقرر کئے گئے۔جسٹس رمنا کی پیدائش 27اگست 1957کو ضلع کرشنا کے ایک کسان خاندان میں ہوئی ہے۔ انہوں نے 1983میں وکیل کے طور پراپنا اندراج کروایا ۔انہوں نے جج کے طورپر خدمات کے آغاز سے پہلے اے پی ہائی کورٹ،سنٹرل اور اے پی ایڈمنسٹریٹیو ٹریبونلس میں بھی وکالت کی تھی۔وہ دستور،فوجداری،بین ریاستی دریاوں کے قوانین کے ماہر سمجھے جاتے ہیں۔جسٹس رمنا ستمبر2013میں دہلی ہائی کورٹ کے چیف جسٹس مقرر کئے گئے تھے۔بعد ازاں ان کو ترقی دیتے ہوئے فروری 2014میں سپریم کورٹ کا جج مقرر کیاگیا ۔جسٹس رمنا تقریباً16 ماہ تک چیف جسٹس کے طور پر خدمات انجام دیں گے۔جسٹس رمنا نے ایمرجنسی کے دور میں سیول لبرٹیز اور 1970کے دوران علیحدہ آندھراریاست کے لئے چلائی گئی جئے آندھراتحریک میں بھی حصہ لیا تھا۔
جسٹس رمنا 48ویں چیف جسٹس مقرر
