رمیش کیسر
نوشہرہ // بگنوٹی مارکیٹ میں ایک افسوسناک واقعے میں ہارڈویئر کی ایک دکان مکمل طور پر خاکستر ہو گئی۔ اطلاعات کے مطابق، ہروندر سنگھ ولد راجندر سنگھ،سکنہ بگنوٹی، کی ہارڈویئر کی دکان میں جمعہ اور ہفتہ کی درمیانی رات پر اسرار حالات میں آگ لگ گئی۔آگ اتنی شدید تھی کہ دکان کے اندر رکھا لاکھوں روپے مالیت کا سامان مکمل طور پر جل کر راکھ ہو گیا۔ دکاندار کے مطابق، دکان میں کئی قیمتی اشیاء موجود تھیں، جن میں تعمیراتی سامان، اوزار، اور دیگر ہارڈویئر کا مال شامل تھا۔واقعے کی اطلاع ملتے ہی مقامی افراد نے آگ پر قابو پانے کی کوشش کی، لیکن شعلے اتنے تیز تھے کہ ان پر قابو پانا ممکن نہ ہو سکا۔ بعد ازاں پولیس نے موقع پر پہنچ کر صورتحال کا جائزہ لیا اور دکاندار کے نقصان کا تخمینہ لگایا۔پولیس کے مطابق، آگ لگنے کی اصل وجوہات کا ابھی تک پتہ نہیں چل سکا ہے، تاہم اس واقعے کی مکمل تحقیقات جاری ہیں۔ ابتدائی معلومات کے مطابق، آگ کسی شارٹ سرکٹ یا دیگر پر اسرار وجہ سے لگی ہو سکتی ہے۔مقامی افراد نے اس واقعے پر گہرے افسوس کا اظہار کیا اور متاثرہ دکاندار کے ساتھ ہمدردی کا اظہار کیا ہے۔ انہوں نے انتظامیہ سے مطالبہ کیا ہے کہ جلد از جلد واقعے کی وجوہات کا پتہ لگا کر متاثرہ کو انصاف فراہم کیا جائے۔
