عظمیٰ نیوز سروس
پونچھ//منشیات سمگلنگ اور عادی مجرموں کے خلاف ایک بڑی کارروائی کرتے ہوئے، ضلع پولیس پونچھ نے کہا کہ منشیات کی غیر قانونی نقل و حمل کی روک تھام (PIT NDPS) ایکٹ کی دفعات کے تحت ایک بدنام زمانہ منشیات فروش کو حراست میں لیا ہے۔پولیس نے ملزم کی شناخت سجاد حسین شاہ عرف سجادہ ولد سرفراز حسین شاہ ساکن پوٹھہ، تحصیل سرنکوٹ، ضلع پونچھ کے طور پر کی ہے جسے ڈویژنل کمشنر جموں کے حکم پر PIT NDPS ایکٹ کے تحت حراست میں لیا گیا ہے۔نظر بندی کے حکم کے جاری ہونے کے بعد، پولیس نے بتایا، پونچھ پولیس نے ملزم کو حراست میں لے لیا اور اسے احتیاطی حراست کے لیے ڈسٹرکٹ جیل ادھم پور میں بند کر دیا۔یہ بات قابل ذکر ہے کہ مذکورہ شخص ایک بدنام زمانہ اور عادی منشیات فروش ہے، جو جموں صوبے میں این ڈی پی ایس ایکٹ کے تحت درج متعدد مقدمات میں سرگرم عمل ہے۔اس کے علاوہ جموں صوبے کے مختلف تھانوں میں اس کے خلاف کئی دیگر ایف آئی آر درج ہیں۔ملزم پر اس سے قبل بھی منشیات کی غیر قانونی تجارت میں مسلسل ملوث ہونے پر حفاظتی دفعات کے تحت مقدمہ درج کیا گیا تھا۔پولیس نے کہا کہ پی آئی ٹی این ڈی پی ایس ایکٹ کے تحت اس کی گرفتاری منشیات کی لعنت کو روکنے اور معاشرے کی حفاظت اور بہبود کو یقینی بنانے کے لیے ضلع پولیس پونچھ کے مضبوط عزم کی عکاسی کرتی ہے۔
