عظمیٰ نیوز سروس
سرینگر//وزیر اعلیٰ مسٹر عمر عبداللہ نے کل اننت ناگ کے جبلی پورہ میں واقع بین الاقوامی فروٹ منڈی میں ایک جدید ترین پھل اور سبزیوں کی پروسیسنگ سینٹر کا افتتاح کیا ۔پھلوں کی منڈی کیپیکس بجٹ کے تحت 4.30 کروڑ روپے کی تخمینہ لاگت سے قائم کی گئی ہے جس کا مقصد فصل کے بعد کے بنیادی ڈھانچے کو مضبوط کرنا اور علاقے میں باغبانی کی پیداوار کیلئے قدر میں اضافہ کرنا ہے ۔
اس پروجیکٹ کو جموں و کشمیر ہارٹیکلچرل پروڈیوس مارکیٹنگ اینڈ پروسیسنگ کارپوریشن لمٹیڈ نے انجام دیا ۔ اس موقع پر خطاب کرتے ہوئے وزیر اعلیٰ نے کہا کہ اس طرح کے جدید انفراسٹرکچر کا قیام فصل کے بعد ہونے والے نقصانات کو کم کرنے اور کاشتکاروں کیلئے بہتر منافع کو یقینی بنانے میں اہم کردار ادا کرے گا ۔ انہوں نے مزید کہا کہ حکومت باغبانی کے شعبے میں ایک مضبوط ویلیو چین بنانے پر توجہ مرکوز کر رہی ہے جس سے مقامی پیداوار کو قومی اور بین الاقوامی منڈیوں میں مقابلہ کرنے کے قابل بنایا جا سکے ۔ ایک جامع سہولت کے طور پر ڈیزائن کیا گیا یہ سینٹر بہت سے جدید اجزاء سے لیس ہے جس کا مقصد نقصانات کو کم کرنا اور مصنوعات کے معیار کو بہتر بنانا ہے ۔ اس میں فروٹ اینڈ بیجی ٹیبل ( ایف اینڈ وی ) گیننگ اور پیکجنگ یونٹ ، چھانٹنے اور گریڈنگ کیلئے ایک وقف شدہ پیک ہاوس ، ایک مشروم پروسیسنگ یونٹ اور ٹماٹر پیوری کی تیاری کی سہولت شامل ہے اس کے علاوہ مرکز میں 400-500 کلو گرام فی گھنٹہ پروسیسنگ کی صلاحیت کے ساتھ ایک اعلیٰ صلاحیت کا پھل خشک کرنے والا یونٹ ، 20 میٹرک ٹن کا فریزنگ چیمبر اور جدید پیکجنگ اور اسٹوریج کی سہولیات شامل ہیں ۔
