محمد تسکین
بانہال// اتوار کی دوپہر بعد سے شروع ہوئی بارشوں کے باوجود جموں سرینگر قومی شاہراہ پر ٹریفک کی نقل و حرکت معمول کے مطابق جاری ہے اور مسافر گاڑیوں کیا دوطرفہ ٹریفک کے علاوہ وادی کشمیر سے جموں کی طرف ٹرکوں کو چلنے کی اجازت تھی۔اتوار کے روز بارشوں کے سلسلے کی وجہ سے موسم خوشگوار بنا ہوا ہے اور لوگوں کے ساتھ ساتھ زمینداروں نے پچھلے تین روز سے وقفے وقفے کی بارشوں سے راحت کی سانس لی ہے۔شاہراہ پر اتوار کے روز بھی کئی مقامات پر ٹریفک جام کی صورتحال رہی تاہم دوپہر بعد اس پر قابو پایا گیا۔ ٹریفک حکام نے بتایا کہ مسافر گاڑیوں کو دونوں طرف کے ٹریفک کے ساتھ ساتھ وادی کشمیر سے ٹرکوں کو جموں کی طرف چلنے کی اجازت تھی۔ انہوں نے کہا کہ رام بن بانہال سیکٹر میں کئی مقامات پر ٹریفک کی نقل و حرکت سست رہی اور اتوار شام تک ٹریفک معمول کے مطابق آگے بڑھ رہا تھا۔
