عظمیٰ نیوز سروس
نئی دہلی //پارلیمنٹ میں ایک طاقتور مداخلت میںممبر پارلیمنٹ بارہمولہ انجینئر رشید نے جموں و کشمیر کے ہائیڈرو پاور پروجیکٹوں کی NHPC سے جموں کشمیر کو فوری واپسی کا مطالبہ کرتے ہوئے کہا کہ کارپوریشن “ایسٹ انڈیا کمپنی کی طرح برتاؤ جاری رکھے ہوئے ہے جبکہ ہمارے وسائل کو دن دہاڑے لوٹا جا رہا ہے۔ انجینئر رشیدنے کہا کہ جموں و کشمیر کے لوگوں نے بجلی کے منصوبوں کی ملکیت کو بحال کرنے کے دیرینہ مطالبہ پر انصاف کا بہت طویل انتظار کیا ہے۔انہوں نے کہا “ایم او یوز کا احترام کریں، جموں و کشمیر کو وہ دیں جو جموں و کشمیر کا حق کے ساتھ ہے۔ انہوں نے زور دیتے ہوئے کہا کہ مناسب مقامی فائدے کے بغیر جموں کشمیر کی ہائیڈرو پاور صلاحیت کے استحصال نے زمین پر شدید ناراضگی پیدا کی ہے۔انہوں نے حکومت پر زور دیا کہ وہ اوڑی، ڈوڈہ، ریاسی، چناب ویلی اور پیر پنجال میں مقامی لوگوں کے لیے ترجیحی روزگار کو یقینی بنائے، جہاں ہائیڈرو پاور کی بڑی تنصیبات نے علاقوں کو متاثر کیا ہے۔ انہوں نے زور دے کر کہا کہ یہ منصوبے ہمارے لوگوں کی زمین، پانی اور قربانیوں پر قائم ہیں۔ انجینئر رشید نے کہا کہ جموں و کشمیر کے لوگ اس دیرینہ مطالبہ کے پیچھے مضبوطی سے کھڑے ہیں۔ انہوں نے ہر ہائیڈرو پاور پراجیکٹ کے 5 کلومیٹر کے دائرے میں مفت بجلی، مقامی علاقے کی ترقی کے لیے CSR فنڈز کا استعمال اور کمیونٹیز کو اپنی زمین سے حاصل کیے گئے وسائل سے براہ راست فائدہ اٹھانے کو یقینی بنانے کے لیے ایک شفاف فریم ورک پر زور دیا۔ انجینئر رشید نے مرکز پر زور دیتے ہوئے کہا کہ وہ پروجیکٹوں کی واپسی کا عمل شروع کرکے خلوص کا مظاہرہ کرے اور کہا کہ اس سے نہ صرف ایک تاریخی غلطی کو درست کیا جائے گا بلکہ عوام اور حکومت کے درمیان اعتماد بھی بحال ہوگا۔
