دہلی میں احتجاج کا اعلان،ایپل فارمرز فیڈریشن آف انڈیا کی تشکیل
عظمیٰ نیوز سروس
سرینگر// جموں و کشمیر، ہماچل پردیش اور اتراکھنڈ کے سیب کے کاشتکار امریکی سیب پر مجوزہ ڈیوٹی رعایت کے خلاف اگلے ماہ دہلی میں احتجاج کریں گے تاکہ گھریلو کاشتکاروں کو نقصان سے بچایا جا سکے۔ہندوستان نے عبوری تجارتی معاہدے کے تحت سیب پر امریکہ کو کوٹہ پر مبنی ڈیوٹی رعایت دی ہے۔ امریکہ سے سیب بغیر کسی درآمدی محصول کے ہندوستانی بازار میں داخل ہوں گے۔کاشتکاروں کو خدشہ ہے کہ امریکہ سے آنے والے سیب ہندوستانی بازار میں بھر جائیں گے اور اس کے نتیجے میں گھریلو کسانوں کو بڑا دھچکا لگے گا۔ایم ایل اے کولگام اور ٹریڈ یونین لیڈر محمد یوسف تاریگامی نے یہاں نامہ نگاروں کو بتایاکہ ہم نے کشمیر، ہماچل اور اتراکھنڈ کے سیب کے کاشتکاروں پر مشتمل ایپل فارمرز فیڈریشن آف انڈیا (AFFI) تشکیل دیا ہے۔ ہم نے مارچ میں (تجارتی معاہدے کے خلاف) دہلی میں احتجاج کرنے کا فیصلہ کیا ہے ۔
تاریگامی نے کہا کہ اے ایف ایف آئی نے سمیوکت کسان مورچہ سے اپیل کی ہے کہ وہ ملک کے سیب کے کسانوں کے ساتھ یکجہتی کے طور پر کھڑے ہوں جنہیں اپنی روزی روٹی پر حملے کا سامنا ہے۔ سمیوکت کسان مورچہ، جس نے ایک سال سے زائد عرصے تک جاری رہنے والے احتجاج کے دوران حکومت کو فارم کے تین قوانین واپس لینے پر مجبور کیا، نے وفاق کو یقین دلایا ہے کہ وہ احتجاج کی حمایت کرے گا۔ انہوں نے وعدہ کیا ہے کہ ان کی قیادت احتجاج میں شامل ہو گی ۔ہند۔امریکہ تجارتی معاہدے پر، تاریگامی نے کہا کہ یہ امریکہ کے سامنے عملی طور پر ایک ہتھیار ڈالنے والا جیسا ہے۔انہوں نے کہا کہ آپ کو معلوم ہوگا کہ اس تجارتی معاہدے میں امریکا نے بھارت کو روس سے تیل خریدنے پر پابندی لگا دی ہے، اگر ہمارے ملک کو کچھ خریدنا ہے تو ہمیں امریکا کی خواہشات پر غور کرنا چاہیے، ہم تجارت کے حوالے سے اپنے فیصلوں میں خودمختار نہیں ہوں گے۔کولگام کے ایم ایل اے نے کہا کہ سیب کی صنعت کشمیر کی معیشت میں ریڑھ کی ہڈی کی حیثیت رکھتی ہے۔انہوں نے مزید کہا کہ جموں میں چھوٹے صنعتی یونٹ ہیں لیکن ہمارے یہاں زیادہ نہیں ہیں۔ ہمارے پاس دستکاری تھی لیکن وہ بھی زوال کا شکار ہیں۔ ہماری آخری امید سیب ہے لیکن اب ہم امریکی سیب کا مقابلہ نہیں کر سکتے۔
