اراضی ریکارڈ کے نظام’ آپکی زمین آپکی نگرانی‘ کا آغاز

 

سرینگر// حکومت نے جموں کشمیر میں اراضی ریکارڈ معلوماتی نظام کے تحت’آپ کی زمین آپکی نگرانی‘ رابطہ گاہ کا قیام عمل میں لایا تاکہ آن لائن طریقہ کار پر اراضی ریکارڈ تک رسائی حاصل ہوسکے۔ حکومت کی جانب سے محکمہ مال کے کمشنر سیکریٹری وجے کمار بدوری نے ایک سرکیولر جاری کیا جس میں کہا گیا ہے کہ شہریوں کو دیگر اراضی سے متعلق معلومات آن لائن طریقہ پر رسائی حاصل ہوگی،جبکہ اس کو آپس میں جوڑ دیا گیا ہے۔ سرکیولر میں کہا گیاہے کہ ارضی ریکارڈ تک رسائی کی سہولیات کیلئے محکمہ مال کے تمام افسران، سب ڈویژنل مجسٹریٹ و نیابتیں،بلاک ڈیولپمنٹ افسران،پنچایت گھرئوں اور سی ایس سی مراکز نوڈل پوائنٹس ہونگے۔ سرکیولر میں ضلع ترقیاتی کمشنروں کو اس بات کو یقینی بنانے پر زور دیا گیا ہے کہ وہ ان نوڈل پوائنٹوں پر معقول کونٹروں کا قیام عمل میں لاکر معقول عملے کو تعینات کرے،جبکہ آن لائن پورٹلوں سے متعلق اضلاع میں بیداری مہم بھی شروع کی جائے۔ سرکیولر میں کہا گیا ہے’’ پورٹلوں پر شہریوں کی جانب سے درج شکایت کا ڈپٹی کمشنر وں کی جانب سے  ہفتہ وار بنیادوں پر انتظامی سیکریٹریوں کی جائزے کے ساتھ معیاد بند مدت کے دوران ازالہ کریںگے۔ تمام تحصیلداروں سے تاکید کی گئی ہے کہ ان کیلئے آن لائن پورٹلوں پر ’لاگ ان ‘ کرنا اور اپنے دائرہ حدود میں جمعبندی، گرداواری،موسوی ،انتقال کا’آپ ڈیٹ‘  اور صورتحال کا مشاہدہ کرنا لازمی ہوگا،اور پورٹل پر دستیاب ریکارڈ ،اس کی دستیابی کی مدت اور پورٹل پر عدم دستیاب ریکارڈ یا پورٹل پر اپ ڈٰیٹ نہ کیا گیا ریکارڈسے متعلق سرٹیفکیٹ کو مرتب کرکے متعلقہ ضلع ترقیاتی کمشنروں کو پیش کرنا ہوگا،جو بعد میں انہیں انتظامی سیکریٹریوں کے ساتھ اشتراک کریں گے۔ سرکیولر میں کہا گیا ہے کہ یہ معلومات پٹوار حلقہ کی بنیادوں پر ہونی چاہے،جس پر متعلقہ پٹواری،گردوار، نائب تحصیلدار،تحصیلدار کا نام، عہدہ اور تاریخ درج ہونا چاہیے جبکہ اس کی توثیق متعلقہ ایس ڈی ایم یا اسسٹنٹ کمشنر مال کی جانب سے ہونی چاہیے۔ادھرلیفٹیننٹ گورنر کی سربراہی والی انتظامیہ نے جموں کشمیر میں ریوینو کورٹ کیسوں کے نگرانی نظام کو لاگو کرنے کا فیصلہ لیاہے۔ سرکار کا کہنا ہے کہ شکایتوں کا تیزی کے ساتھ ازالہ کرنے اور آن لائن رسائی سہولیات کی فراہمی کیلئے محکمہ کی سرگرمی کو ان ترجیجات تک پہنچانا لازمی بن گیا ہے۔ جاری سرکیولر میں کہا گیا  ہے کہ ریوینو عدالتوں میں کام کاج کو آن لائن یا ای آفس میں تبدیل کرنے کی تجویز دی گئی ہے جس کیلئے تمام پریذائڈنگ افسران کو  اپنے حدود میں آنے والی ریوینو عدالتوں سے متعلق کیسوں کی نظارت نظام کے نفاذ اور مواصلاتی مسائل کیلئے ’این آئی سی و انتظامی محکمہ کے ساتھ روابط کیلئے نوڈل افسران نامزد کیا گیا ہے۔