آسٹریلیا کے ٹیسٹ اسٹارز کی بی بی ایل میں واپسی

یواین آئی

سڈنی/ایشیز جیتنے والی آسٹریلیائی ٹیسٹ ٹیم کے کئی کھلاڑی ہفتہ سے بگ بیش لیگ (بی بی ایل) میں واپسی کریں گے ۔موصولہ اطلاعات کے مطابق الیکس کیری (ایڈیلیڈ اسٹرائیکرز)، برینڈن ڈوگیٹ (میلبورن رینیگیڈز)، جوش انگلس (پرتھ اسکارچرز)، عثمان خواجہ اور مارنس لبوشین (برسبین ہیٹ)، ٹوڈ مرفی اور اسٹیو اسمتھ (سڈنی سکسرس)، جبکہ جیک ویڈرالڈ اور بیو ویب اسٹر (ہوبارٹ ہریکینز) ہفتہ سے اپنی اپنی ٹیموں میں انتخاب کے لیے دستیاب ہوں گے ۔ مائیکل نیسر (برسبین ہیٹ) اور مچل اسٹارک (سڈنی سکسرس) بھی بعد میں لیگ میں شامل ہوں گے ۔ نیسر کے 14 جنوری سے اور اسٹارک کے 16 جنوری سے دستیاب ہونے کی توقع ہے ۔ ادھر اسکاٹ بولینڈ، ٹریوس ہیڈ اور کیمرون گرین بی بی ایل-15 میں حصہ نہیں لیں گے۔ بولینڈ (میلبورن اسٹارز) اور ہیڈ (ایڈیلیڈ اسٹرائیکرز) تمام پانچ ایشیز ٹیسٹ کھیلنے کے بعد مختصر ریکوری مرحلے سے گزریں گے ، جبکہ گرین اب بھی بغیر معاہدہ کے ہیں کیونکہ وہ کمر کی بڑی سرجری کے بعد صحت یاب ہو رہے ہیں۔ بولینڈ نے ایشیز سیریز میں سب سے زیادہ 159.5 اوورز کرائے ، جبکہ ہیڈ آسٹریلیا کے سب سے زیادہ رن بنانے والے کھلاڑی رہے ۔کرکٹ آسٹریلیا نے کہا ہے کہ تمام ٹیسٹ کھلاڑی صحتیابی اور آئندہ بین الاقوامی مقابلوں، جن میں ٹی-20 ورلڈ کپ بھی شامل ہے ، کی تیاری کے درمیان توازن برقرار رکھنے کے لیے انفرادی مینجمنٹ پلان پر عمل کریں گے ، اور جہاں ممکن ہوگا بی بی ایل میں شرکت کی بھی اجازت دی جائے گی۔