ہندوستان ایک تھا، ایک ہے اور ایک رہے گا | یومِ آئین پراراکینِ پارلیمان سے نائب صدر کاخطاب

عظمیٰ نیوز سروس

نئی دہلی//نائب صدر سی پی رادھا کرشنن نے بدھ کے روز یومِ آئین کے موقع پر پارلیمنٹ ہاؤس کے سنٹرل ہال میں اراکینِ پارلیمان سے خطاب کرتے ہوئے کہا کہ ہمارے آئین کی روح نے ایک بار پھر ثابت کر دیا ہے کہ ہندوستان ایک تھا، ایک ہے اور ہمیشہ ایک رہے گا۔انہوں نے کہا کہ آئین ہمارے عظیم آزادی کے مجاہدین کی جدوجہد، قربانی، دانشمندی اور اْن کروڑوں ہندوستانیوں کی امنگوں کا آئینہ ہے جنہوں نے آزادی کے لیے اپنا سب کچھ نچھاور کر دیا۔سی پی رادھا کرشنن نے آئین سازی کے عمل کو یاد کرتے ہوئے کہا کہ مادرِ وطن ہندوستان کے دوراندیش رہنماؤں نے گہرے غور و فکر اور بے مثال بصیرت کے ساتھ آئین تیار کیا۔ انہوں نے سماجی انصاف، کمزور طبقات کے معاشی بااختیار ہونے اور ایک برابری پر مبنی قوم کی تشکیل کو اس میں سب سے بڑی ترجیح دی۔جموں و کشمیر اور بہار انتخابات کا ذکر کرتے ہوئے انہوں نے کہا کہ آرٹیکل 370 ہٹنے کے بعد 2024 میں جموں و کشمیر میں بھاری ووٹنگ نے دنیا کو ایک بار پھر ہندوستان کی جمہوری قوت کا احساس کرایا۔ وہیں حالیہ بہار انتخابات میں خواتین کی ریکارڈ شرکت نے ہندوستانی جمہوریت کے تاج میں ایک اور انمول نگینہ جوڑ دیا ہے۔