عظمیٰ نیوز سروس
ریاسی //بھارت کے سابق نامور کرکٹر اور موجودہ قومی ٹیم کے ہیڈ کوچ گوتم گمبھیر اپنے اہل خانہ کے ہمراہ ماتا ویشنو دیوی مندر میں حاضری اور پوجا کی ادائیگی کے لیے کٹرہ پہنچ گئے۔ ان کے اس روحانی دورے نے مقامی سطح پر توجہ حاصل کی اور بڑی تعداد میں مداح ان کے استقبال کے لیے جمع ہوئے۔
کٹرہ پہنچنے پر گوتم گمبھیر کا شاندار انداز میں خیرمقدم کیا گیا۔ مداحوں نے ان کے ساتھ ملاقات کی، تصاویر بنوائیں اور ان کے حق میں نعرے بھی لگائے۔ گمبھیر نے بھی مداحوں کے ساتھ خوش دلی کا مظاہرہ کرتے ہوئے وقت گزارا اور ان کی درخواست پر تصاویر بنوائیں۔ اس موقع پر ان کے ہمراہ ان کا خاندان بھی موجود تھا۔بعد ازاں وہ اپنے اہل خانہ کے ساتھ ماتا ویشنو دیوی مندر کی طرف روانہ ہوئے جہاں انہوں نے مذہبی رسومات ادا کیں اور دربار میں حاضری دی۔ مندر کے مقدس ماحول میں انہوں نے ملک کی سلامتی، خوشحالی اور ترقی کے لیے خصوصی دعائیں کیں۔واضح رہے کہ گوتم گمبھیر نہ صرف بھارت کے مایہ ناز اوپننگ بلے باز رہے ہیں بلکہ بطور کوچ بھی انہوں نے حالیہ برسوں میں نمایاں کامیابیاں حاصل کی ہیں۔ ان کی کوچنگ میں بھارتی کرکٹ ٹیم نے 2026 کے آئی سی سی مینز ٹی ٹوئنٹی ورلڈ کپ میں شاندار کارکردگی کا مظاہرہ کرتے ہوئے ٹائٹل کا دفاع کیا اور مسلسل دوسری مرتبہ ٹی ٹوئنٹی ورلڈ کپ اپنے نام کیا۔گوتم گمبھیر کی آئندہ مصروفیات بھی کافی اہم ہیں۔ جون میں وہ افغانستان کے خلاف ہوم سیریز میں بھارتی ٹیم کی قیادت کریں گے جس میں ایک ٹیسٹ اور تین ون ڈے میچز شامل ہوں گے۔ اس کے بعد جولائی میں ٹیم انگلینڈ کا دورہ کرے گی جہاں بیلفاسٹ میں آئرلینڈ کے خلاف دو ٹی ٹوئنٹی میچز بھی شیڈول ہیں۔کٹرہ میں ان کی موجودگی کو مداحوں نے ایک یادگار لمحہ قرار دیا اور ان کے لیے نیک خواہشات کا اظہار کیا۔
