عظمیٰ نیوز سروس
جموں// نیشنل کانفرنس اور کانگریس کے ایم ایل ایز نے پیر کو گاندربل انکائونٹر کی عدالتی تحقیقات کا مطالبہ کرتے ہوئے الزام لگایا کہ ایک بے گناہ شخص کی فائرنگ کے تبادلے میں موت ہوئی ہے۔وقفہ سوالات کے آغاز سے پہلے اس معاملے کو اٹھاتے ہوئے، این سی کے قانون سازوں نے کھڑے ہو کر الزام لگایا کہ گاندربل میں فائرنگ کے تبادلے میں ایک بے گناہ مارا گیا ہے۔
مبارک گل نے کہا”ایسا نہیں ہونا چاہیے، ہم تسلیم کرتے ہیں کہ ایل جی نے انکوائری کا حکم دیا ہے، لیکن محکمہ داخلہ اور وزیر داخلہ کو یہ پیغام دینا چاہیے کہ اس حساس ریاست میں کسی بے گناہ کو قتل نہیں کیا جانا چاہیے، عسکریت پسندوں اور عام شہریوں میں فرق ہونا چاہیے،” ۔کانگریس ایم ایل اے عرفان حافظ لون، جنہوں نے ایک پلے کارڈ لہرایا جس میں لواحقین کے لیے انصاف کا مطالبہ کیا گیا، مقتول کے اہل خانہ کے لیے انصاف کا مطالبہ کیا۔جسٹس (ریٹائرڈ)حسنین مسعودی نے نشاندہی کی کہ لاش کو تدفین کے لیے اہل خانہ کے حوالے نہیں کیا گیا تھا۔ انہوں نے کہا کہ باعزت تدفین کا حق آئینی طور پر تسلیم شدہ حق ہے۔کانگریس کے نظام الدین بھٹ نے دلیل دی کہ مجسٹریل انکوائری کافی نہیں ہے اور اصرار کیا کہ عدالتی انکوائری کا حکم دیا جائے۔
انہوں نے کہا کہ فوری انصاف ہونا چاہیے۔ میر سیف اللہ نے مزید کہا کہ مستقبل میں ایسے واقعات کو روکنے کے لیے سیکورٹی فورسز کو لگام دی جانی چاہیے۔ انہوں نے کہا کہ اس معاملے میں مجسٹریل یا جوڈیشل انکوائری کا حکم دیا جانا چاہیے۔بی جے پی کے آر پٹھانیا نے کھڑے ہو کر دعوی کیا کہ ایوان اس معاملے پر بحث نہیں کر سکتے کیونکہ یہ اس کے دائرہ اختیار سے باہر ہے۔انہوں نے پوچھا “میرے آٹھ ستاروں والے سوالات کو اس بنیاد پر مسترد کر دیا گیا ہے کہ وہ ایل جی یا حکومت ہند سے متعلق معاملات کے تحت آتے ہیں، اس معاملے پر بحث کیسے ہو رہی ہے جو ایوان کے دائرہ اختیار میں نہیں ہے؟” ۔اسمبلی سے باہر نایب وزیر اعلیٰ نے اس معاملے پر کہا کہ دہشت گردی کی کوئی جگہ نہیں ہے، لیکن بے گناہوں کو نقصان نہیں اٹھانا چاہئے۔انہوں نے کہا کہ حکومت عوام کے سامنے جوابدہ ہے۔ نائب وزیر اعلیٰ نے کہا کہ واقعہ کی تحقیقات کا لیفٹیننٹ گورنر نے پہلے ہی حکم دیا ہے اور حکومت اس کے نتائج کی بنیاد پر کارروائی کرے گی۔انہوں نے خبردار کیا کہ اگر گاندربل انکائونٹر فرضی پایا گیا تو سخت کارروائی کی جائے گی اور اس بات پر زور دیا کہ اس طرح کے واقعات کو دہرایا نہیں جانا چاہئے۔انہوں نے کہا کہ ہم اپوزیشن کے کہنے پر کام نہیں کر رہے، عمر عبداللہ کی قیادت والی حکومت عوامی حکومت ہے، ہم اپنے وعدوں کو پورا کرنے کے لیے حاضر ہیں، اپوزیشن کو اپنے وعدوں کا جواب دینا چاہیے۔
