گاندربل میں پہلی انڈور روئنگ چیمپئن شپ کا انعقاد

گاندربل//ضلع گاندربل میں پہلی انڈور روئنگ چمپئن شپ اکل انڈور اسٹیڈیم سہپورہ میں منعقد ہوئی جس کی صدارت ڈپٹی کمشنر (ڈی سی) گاندربل، شیامبیر نے کی۔چیمپئن شپ میں ضلع کے تمام زمروں (سینئر، جونیئر اور سب جونیئر) کے تقریباً 200 لڑکوں اور لڑکیوں نے حصہ لیا۔اس موقع پر خطاب کرتے ہوئے ڈی سی نے کہا کہ ضلعی انتظامیہ نوجوانوں کی صلاحیتوں کو نکھارنے کے لیے پرعزم ہے اور اس سلسلے میں ضلع میں کھیلوں کے انفراسٹرکچر کو اپ گریڈ کرنے کے لیے تمام اقدامات کیے جائیں گے تاکہ کھیلوں سے محبت کرنے والے نوجوانوں کو کھیلوں کی بہتر سہولیات میسر آ سکیں۔انہوں نے یہ بھی اعلان کیا کہ مقامی نوجوانوں کے مطالبہ کے مطابق انڈور اسٹیڈیم سہ پورہ میں ٹرانسفارمر نصب کیا جائے گا۔انڈور روئنگ ایک نسبتاً نیا کھیل ہے جو روئنگ مشین (ارگو) پر کیا جاتا ہے، جو روایتی طور پر ورزش یا روئنگ ٹریننگ کے مقصد کے لیے واٹر کرافٹ روئنگ کے عمل کی نقل کرنے کے لیے استعمال کیا جاتا ہے۔بعد ازاں ایک پروقار تقریب بھی منعقد کی گئی جس میں تمام کیٹیگریز میں جیتنے والوں میں انعامات تقسیم کیے گئے۔