عظمیٰ نیوز سروس
سرینگر// جموں و کشمیر حکومت نے اتوار کو بھرتیوں میں بدعنوانی کے الزامات کو مسترد کرتے ہوئے کہا کہ ملازمتوں کے لیے آئوٹ سورسنگ کا عمل ان کے اقتدار میں آنے سے پہلے شروع کیا گیا تھا۔وزیر اعلی کے مشیر ناصر اسلم وانی نے نامہ نگاروں کو بتایا، “ہم نے آئوٹ سورسنگ کا یہ عمل شروع نہیں کیا ، ہمیں یہ وراثت میں ملا، بالکل اسی طرح جیسے انہوں (پی ڈی پی) نے ہمیں آرٹیکل 370 کی منسوخی اور سابقہ ریاست کی تقسیم کا سامنا کرنے کے لیے چھوڑ دیا تھا،” ۔وانی نے، وزرا سکینہ ایٹو اور جاوید ڈار کے ہمراہ، ایک پریس کانفرنس میں پی ڈی پی صدر محبوبہ مفتی کی طرف سے لگائے گئے بیک ڈور تقرریوں کے الزامات کو مسترد کیا۔ وانی نے اپوزیشن جماعتوں کو چیلنج کیا کہ وہ حکومت کی طرف سے کی گئی ایک بیک ڈور تقرری کا ثبوت فراہم کریں۔وانی نے کہا کہ حکومت کی بھرتی کی پالیسی کے حوالے سے ابہام پیدا کرنے کی کوشش کی گئی ہے۔انہوں نے کہا کہ ہم غلط فہمیوں کو دور کرنے کے پابند ہیں کیونکہ یہ ہماری ذمہ داری ہے کہ ہم اس بات کو یقینی بنائیں کہ حقائق عوام کے سامنے رکھے جائیں۔وانی نے کہا کہ جموں و کشمیر میں آئوٹ سورسنگ فریم ورک 2015 سے 2018 تک بنایا گیا تھا، جب پی ڈی پی-بی جے پی مخلوط حکومت برسراقتدار تھی۔انہوں نے کہا، “تعیناتی کا عمل، جن پر اب سوال اٹھائے جا رہے ہیں، 2024 کے اسمبلی انتخابات سے پہلے شروع کیا گیا تھا۔ وہی عمل ابھی جاری ہے،” ۔مشیر نے کہا کہ این سی حکومت نے شفاف اور میرٹ پر مبنی عمل کے ذریعے 40,000 آسامیوں کو پر کرنے کا عمل شروع کیا ہے۔انہوں نے مزید کہا کہ “اس کے جلد مکمل ہونے کی امید ہے۔”انہوں نے کہا، “اب کوئی پیپر لیک، منسوخ شدہ انتخابی فہرستیں یا کوئی اور بے ضابطگیاں نہیں ہیں، یہ چیزیں اب تاریخ کے حوالے کر دی گئی ہیں۔”ایتو نے کہا کہ آئوٹ سورس اہلکار سرکاری محکموں میں کل وقتی پوسٹوں کی جگہ نہیں لے رہے ہیں۔انہوں نے کہا، “یہ مختصر مدت کے انتظامات ہیں کیونکہ آئوٹ سورس ملازمین کسی بھی محکمے میں ملازمین کی منظور شدہ تعداد کے علاوہ ہیں۔”
