کمرشل عمارت کی مسماری | انکوائری کا حکم، سی ای او کٹھوعہ منسلک

جموں//ڈائریکٹوریٹ آف اربن لوکل باڈیز جموں نے لوگوں کے مظاہروں اور غصے کے بعد ضلع کٹھوعہ میں شاپنگ کمپلیکس کے انہدام کے بارے میں حقائق کا پتہ لگانے کے لیے تحقیقات کا حکم دیا ہے۔ڈائریکٹوریٹ نے چیف ایگزیکٹیو آفیسر کٹھوعہ سنتوش کوتوال کو بھی منسلک کیا ہے۔”ڈائریکٹر اربن لوکل باڈیز، جموں کے جاری کردہ ایک حکم میں لکھاگیا ہے’’وارڈ نمبر 6، کٹھوعہ میں ایک عمارت کو مسمار کرنے اور اس کے بعد پیدا ہونے والے امن و امان کے مسائل سے متعلق سوشل میڈیا پر شائع ہونے والی رپورٹوں کے پیش نظر سینئر لاء آفیسر، وسیم شوکت بٹ کی سربراہی میں ای او ایم سی ریاسی امیت شرما بحیثیت ممبر، میونسپل کمیٹی کٹھوعہ کے متعلقہ کیس میں عمل پیرا ہونے کے طریقہ کار سے متعلق حقائق کی سچائی کا پتہ لگانے کے لیے ایک کمیٹی بنانے کا حکم دیا گیاہے‘‘۔اس میں کہا گیا ہے کہ کمیٹی انہدام کیس سے متعلق تمام متعلقہ کاغذات کے ساتھ دس دن کے اندر ڈائریکٹوریٹ کو رپورٹ پیش کرے گی۔حکم نامے میں کہا گیا ہے کہ “اس طرح کی انکوائری کے التوا میں، سی ای او کٹھوعہ سنتوش کوتوال کو فوری اثر کے ساتھ شہری لوکل باڈیز جموں کے ڈائریکٹوریٹ کے دفتر میں منسلک کیا گیا ہے۔” اس میں کہا گیا ہے کہ ایگزیکٹو آفیسر، ایم سی رام گڑھ، جودھ راج اگلے احکامات تک میونسپل کونسل کٹھوعہ کے اضافی چارج کی دیکھ بھال کریں گے۔قابل ذکر بات یہ ہے کہ کٹھوعہ میں تاجروں اور لوگوں نے تجارتی مقصد کے لیے بغیر اجازت کے مبینہ غیر قانونی تعمیرات کے الزام میں تین منزلہ تجارتی عمارت کے خلاف انہدام کی مہم کے فوراً بعد احتجاج کیا۔ عمارت کے مالک اور شوروم کے مالک نے دعویٰ کیا کہ انہوں نے کروڑوں روپے کی سرمایہ کاری کی ہے۔ کشیدگی بڑھنے کے ساتھ ہی عمارت سے منسلک ایک شخص موہندر پال غائب ہو گیا اور اس سے صورتحال مزید بگڑ گئی۔لواحقین اور پولیس نے اس کی تلاش کی لیکن اس کا کوئی پتہ نہیں چل سکا۔
۔۔۔۔۔۔۔۔۔۔۔۔۔۔۔۔۔۔۔