عظمیٰ نیوز سروس
ریاسی //ڈپٹی انسپکٹر جنرل (ڈی آئی جی) پولیس ادھم پور۔ریاسی رینج شیو کمار شرما نے ضلع ریاسی کے اہم مقامات بشمول رنسو، شیو کھوڑی اور پونی کا دورہ کر کے سیکورٹی انتظامات اور آپریشنل تیاریوں کا جامع جائزہ لیا۔ اس دورے کا مقصد جاری یاترا کے پیش نظر حفاظتی اقدامات کو مزید مضبوط بنانا اور زائرین کو محفوظ ماحول فراہم کرنا تھا۔تفصیلات کے مطابق، ڈی آئی جی نے فیلڈ افسران کے ہمراہ مختلف سکیورٹی پوائنٹس کا معائنہ کیا اور اسپیشل آپریشنز گروپ ،مقامی پولیس اسٹیشنز اور علاقے میں تعینات سی آر پی ایف یونٹس کی کارکردگی اور تیاریوں کا باریک بینی سے جائزہ لیا۔
انہوں نے سکیورٹی گرڈ کی مجموعی صورتحال کا بھی معائنہ کیا اور اس بات کو یقینی بنایا کہ یاترا کے دوران ہر ممکن حفاظتی اقدام بروئے کار لایا جائے۔دورے کے دوران شیو کمار شرمانے شیو کھوری درگاہ پر آئے ہوئے یاتریوں سے ملاقات کی اور ان سے سہولیات اور سکیورٹی انتظامات کے حوالے سے فیڈبیک حاصل کیا۔ یاتریوں نے مجموعی انتظامات پر اطمینان کا اظہار کیا، تاہم کچھ مقامات پر مزید بہتری کی ضرورت پر بھی زور دیا۔ڈی آئی جی نے موقع پر موجود افسران کو ہدایت دی کہ وہ ہر وقت چوکسی برقرار رکھیں، مختلف سکیورٹی ایجنسیوں کے درمیان موثر تال میل کو یقینی بنائیں اور یاتریوں کو ہر ممکن سہولت فراہم کریں۔ انہوں نے واضح کیا کہ یاترا کے دوران کسی بھی قسم کی لاپرواہی برداشت نہیں کی جائے گی اور ہر اہلکار کو اپنی ذمہ داری پوری دیانتداری سے نبھانی ہوگی۔اس موقع پر سکیورٹی انفراسٹرکچر کا بھی تفصیلی جائزہ لیا گیا جس میں ایکس رے بیگیج اسکیننگ سسٹم، سی سی ٹی وی نگرانی، اور کنٹرول روم آپریشنز شامل ہیں۔ ڈی آئی جی نے ان تمام نظاموں کی کارکردگی کا معائنہ کیا اور ہدایت دی کہ جدید ٹیکنالوجی کا مؤثر استعمال یقینی بنایا جائے تاکہ کسی بھی ممکنہ خطرے سے بروقت نمٹا جا سکے۔انہوں نے رنسو بازار، بس اسٹینڈ، یاترا پرچی کاؤنٹر، کنڈا موڑ اور جندی موڑ جیسے اہم عوامی مقامات کا بھی دورہ کیا جہاں ہجوم کے نظم و نسق اور سکیورٹی تعیناتی کا جائزہ لیا گیا۔ افسران نے انہیں بریفنگ دیتے ہوئے بتایا کہ یاترا کے پیش نظر اضافی نفری تعینات کی گئی ہے اور حساس مقامات پر خصوصی نگرانی رکھی جا رہی ہے۔حکام کے مطابق، ڈی آئی جی نے سخت نگرانی برقرار رکھنے، فوری ردعمل کے نظام کو مزید بہتر بنانے اور زائرین کے لیے محفوظ اور بلا رکاوٹ یاترا کو یقینی بنانے پر خصوصی زور دیا۔ انہوں نے اس بات کا اعادہ کیا کہ عوام کے تحفظ کو اولین ترجیح دی جائے گی اور کسی بھی ہنگامی صورتحال سے نمٹنے کے لیے تمام تیاریاں مکمل رکھی جائیں گی۔دورے کے اختتام پر شیو کمار شرمانے مجموعی انتظامات پر اطمینان کا اظہار کیا، تاہم انہوں نے مزید بہتری کے لیے متعلقہ حکام کو ضروری ہدایات بھی جاری کیں تاکہ یاترا پر آنے والے تمام عقیدت مندوں کو ایک محفوظ اور خوشگوار تجربہ فراہم کیا جا سکے۔
