سید امجد شاہ
جموں// بارڈر سیکورٹی فورس (بی ایس ایف) نے پونچھ میں فوجی دستوں پر حالیہ حملے کے پیش نظر جموں، سانبہ اور کٹھوعہ اضلاع میں بین الاقوامی سرحد پر ہائی الرٹ جاری کر دیا ہے۔بی ایس ایف کے ایک سینئر افسر نے کہا “ہم نے آئی بی پر سیکورٹی گرڈ کو سخت کر دیا ہے اور تمام سیکورٹی ایجنسیوں بشمول مرکزی انٹیلی جنس ایجنسیوں اور جموں و کشمیر پولیس کے ساتھ تال میل میں چوبیس گھنٹے صورتحال کی نگرانی کر رہے ہیں۔”بی ایس ایف کے افسر نے اعلیٰ سطح پر صورتحال کے جائزے کا حوالہ دیتے ہوئے کہا کہ ’’ہمارے دستے پوری چوکسی کے ساتھ سرحد پر گشت کر رہے ہیں تاکہ سرحد پار سے دراندازی نہ ہو‘‘۔”جہاں تک پاک بھارت سرحد پر زیر زمین سرنگوں کا تعلق ہے، ہم نے ماضی میں سرنگوں کا پتہ لگایا ہے اس سے پہلے کہ وہ دہشت گرد اس طرف دراندازی کے لیے استعمال کر سکیں۔ بی ایس ایف کسی بھی قسم کی صورتحال سے نمٹنے کے لیے پوری طرح تیار ہے،‘‘ بی ایس ایف افسر نے کہا۔قابل ذکر بات یہ ہے کہ دہشت گردانہ حملہ پونچھ میں 20 اپریل کو ہوا تھا جس میں ہندوستانی فوج کے 5 جوان شہید ہوئے تھے جب کہ دہشت گردوں کو ختم کرنے کے لئے سیکورٹی فورسز کی طرف سے مشترکہ طور پر بڑے پیمانے پر تلاش شروع کی گئی تھی۔21 اپریل کو، ڈائریکٹر جنرل، بی ایس ایف، ڈاکٹر ایس ایل تھاوسین نے بھی جموں کا دورہ کیا اور وہ آئی جی بی ایس ایف جموں فرنٹیئر اور بی ایس ایف کے دیگر سینئر افسران کے ساتھ تھے جنہوں نے بی ایس ایف میں ایک اعلیٰ سطحی میٹنگ کے دوران جموں اور لائن آف کنٹرول میں بین الاقوامی سرحد کے ساتھ سیکورٹی کی صورتحال کا جائزہ لیا ۔ڈی جی بی ایس ایف کو فیلڈ کمانڈروں نے ایل او سی اور جموں آئی بی پر بی ایس ایف کو درپیش حالیہ خطرات کے بارے میں بریفنگ دی۔جائزہ میٹنگ کے دوران جموں اور راجوری میں حالیہ واقعات کی وجہ سے بی ایس ایف کو ایل او سی اور آئی بی پر تسلط قائم کرنے پر خصوصی زور دیا گیا۔جموں میں سیکورٹی میٹنگ کے بعد، ڈی جی بی ایس ایف نے 22 اپریل کو راجوری اور پونچھ کا دورہ کیا تھا جہاں انہوں نے پیر پنجال میں پولیس کے ڈائریکٹر جنرل، سی آر پی ایف کمانڈروں اور فوجی حکام کے ساتھ سیکورٹی سے متعلق امور پر تفصیلی بات چیت کی۔انہوں نے دہشت گردی کے حملے کی جگہ اور پونچھ میں فارورڈ ڈیفنس لوکیشنز کا بھی دورہ کیا تاکہ چیلنجز اور موجودہ سیکورٹی صورتحال کا جائزہ لیا جا سکے۔
