مشیر فاروق خان کی بابا ریشی کی زیارت گاہ پر حاضری | عقیدتمندوں کو فراہم کی جانے والی سہولیات کا جائزہ لیا

ٹنگمرگ//لیفٹیننٹ گورنر کے مشیر فاروق خان نے ٹنگمرگ میں حضرت بابا پیام الدین ریشی ؒ کی زیارت گاہ پر حاضی دی جہاں انہوں نے جموں و کشمیر کیلئے دیرپا امن اور خوشحالی کیلئے دعا کی ۔ اپنے دورے کے دوران مشیر نے زیارت گاہ کی انتظامیہ سے ملاقات کی اور مزار پر دیگر سہولیات کے علاوہ زائرین کو دی جانے والی سہولیات کے بارے میں دریافت کیا ۔ مشیر کے ساتھ سی ای او وقف بورڈ مفتی فرید، مشیر کے او ایس ڈی محمد اشرف حکاک، ایس ڈی ایم ٹنگمرگ اور دیگر متعلقہ افسران بھی تھے ۔ مشیر نے پورے علاقے کا چکر لگایا جہاں انہوں نے مزار پر عقیدت مندوں کو لنگر کی سہولیات ، بورڈنگ /رہائش کی سہولیات ، صفائی ستھرائی اور دیگر متعلقہ سہولیات کے بارے میں دریافت کیا ۔ مشیر نے سی ای او وقف بورڈ کو ہدایت دی کہ مزار کے پورے علاقے کی زمین کی تزئین جلد سے جلد کی جائے اور نئی سہولیات بھی تعمیر کی جائیں  جو تمام ضروریات کے ساتھ ماحول دوست ہونی چاہئیں جن میں عقیدت مندوں کے قیام کیلئے رہائش ، صفائی کمپلیکس اور لنگر کی سہولیات شامل ہیں ۔ انہوں نے وقف حکام پر زور دیا کہ وہ نئی تعمیرات کے منصوبے کو ترتیب دیتے ہوئے اہل کنسلٹنسی کی خدمات کو بروئے کار لائیں ۔ انہوں نے وسائل کے بہترین استعمال پر بھی زور دیا ۔ مشیر فاروق خان نے مزار کے احاطے میں پالی تھین کے استعمال پر پابندی لگانے کا بھی مطالبہ کیا ۔ مشیر نے سینکڑوں عقیدت مندوں اور مقامی لوگوں سے ملاقات کی اور انہیں درپیش مسائل سے آگاہی حاصل کی ۔ مشیر نے سبھی کو غور سے سُنا اور ان کے جائیز مسائل کو ترجیحی بنیادوں پر حل کرنے کا یقین دلایا ۔