یو این آئی
نئی دہلی//آرمی چیف جنرل اُپندر دویدی نے کہا ہے کہ تیزی سے بدلتے اور غیر یقینی عالمی سکیورٹی ماحول کے چیلنجوں سے نمٹنے کے لیے فوج میں بڑے پیمانے پر تبدیلیاں ناگزیر ہیں۔ جنرل دویدی نے فوج کے سمینار ‘چانکیہ ڈیفنس ڈائیلاگ۔2025’ سے خطاب کرتے ہوئے کہا کہ دنیا ایک انتشار کے دور سے گزر رہی ہے ، جہاں بڑی طاقتیں ”مسلسل ٹکرا رہی ہیں اور مقابلہ کر رہی ہیں۔” انہوں نے کہا کہ ”دنیا سرد جنگ کی دو قطبی تقسیم اور ایک مختصر یک قطبی دور کے بعد اب ایک غیر یقینی اور منتشر نظام کی جانب بڑھ رہی ہے ۔” فی الحال دنیا بھر میں 50 سے زائد تنازعات جاری ہیں اور یہ کہنا کہ ہم بے حد پراگندہ دور میں جی رہے ہیں، شاید ایک نرم تبصرہ ہوگا۔”انہوں نے کہا کہ عالمی جغرافیائی سیاست مزاحمتی صلاحیت، قومی سلامتی اور جنگی تیاریوں پر مرکوز ہے اور ایسے میں فوج کے سامنے بنیادی سوال یہ ہے کہ ہنگامی حالات سے نمٹنے کی تیاری کے لیے کس نوعیت کی تبدیلیاں ضروری ہیں۔ انہوں نے طویل المدتی حکمتِ عملی پیش کرتے ہوئے کہا کہ اس کا مقصد فوج کا انضمام اور اسے جدید ٹیکنالوجی سے لیس کرنا ہے ۔آرمی چیف نے کہا کہ فوج میں جامع تبدیلیاں خود انحصاری، تیز رفتار اختراع، موافقت اور ماحولیاتی نظام کی بہتری اور ملٹری سویلین کوآرڈینیشن پر زور دینے کی ضرورت ہے ۔ انہوں نے ”مختلف شعبوں میں گہری ہم آہنگی” کی ضرورت پر زور دیتے ہوئے کہا کہ جنگی صلاحیتوں کی ترقی ایک کثیر ادارہ جاتی اور کثیر جہتی کوشش ہونی چاہیے ۔انہوں نے کہا کہ ”فوجی تنظیم رکاوٹیں ختم کر رہی ہے اور فائرنگ کی حدود کھول رہی ہے ، اسٹارٹ اپس کو فنڈ دے رہی ہے اور قومی ٹیکنالوجی مشنز میں شامل ہو رہی ہے ”۔ ساتھ ہی انہوں نے کہا کہ طویل مدتی عالمی شراکت داری کے لیے تعلیمی اداروں، صنعت اور فوج کے درمیان تعاون ضروری ہے ۔ سمینار کا موضوع ”تبدیلی کے لیے اصلاحات: مضبوط، محفوظ اور ترقی یافتہ ہندوستان” ہے ، اور اس کا انعقاد فوج اور سینٹر فار لینڈ وارفیئر اسٹڈیز کے اشتراک سے کیا جا رہا ہے ۔
